2026 жылы елде сиыр еті, фарш, тұз, тауық етінің саны мен басқа да өнімдердің бағасы өсіп отыр. Әсіресе, қой етінің бағасы қымбаттап кетті. Сауда министрі Арман Шаққалиев Үкіметтегі брифингте қой етінің қымбаттауына не себеп болғанын айтып берді.
Қой етімен қатар елде сиыр еті, фарш, тұз, тауық етінің саны мен басқа да өнімдердің бағасы өсіп отыр.
Министр өз кезегінде бағаның өскенін жоққа шығармады.
«Иә, шынында да, ет өнімдері бойынша баға динамикасын көріп отырмыз, бірақ сонымен қатар Ауыл шаруашылығы министрлігімен бірлесіп бірқатар шаралар қабылдағанымызды атап өткен жөн», – деді ол.
Қой етінің қымбаттауына не себеп?
Айтуынша, Парсы шығанағындағы белгілі оқиғалар қой етінің бағасына әсер еткен. Дегенмен министр бүгінгі таңда бағаның күрт шарықтағанын байқамағанын айтты.
«Бүгінгі таңда баға динамикасын алсақ, ол орташа деңгейде, өсім байқалады, бірақ бұл – қалыпты өсім. Демек, ең бастысы – сатылымда ет бар. Мысалы, біз соңғы демалыс күндері базардағы бағаға мониторинг жасадық, сүйекті сиыр еті – 3700 теңге», – деді ол.
Министр ет өнімдеріне деген сұраныс жалпы алғанда өте жоғары екенін айтты. Мәселен, әлем бойынша Қытайда тұтыну көлемі едәуір өскен, Африкада да өсті, жалпы әлемде тұтыну сипаты өзгеріп келеді.
Бұған дейін шілде айында көкөніс арзандағанымен ет бағасы шарықтап кеткенін жазған едік. Ең жоғары өсім шұжық пен ет өнімдерінде тіркелді – олардың бағасы бір жылда 15,9%-ға қымбаттады.
