Ағылшынның «Челси» клубында шыңдалып жүрген қазақ футболшысы Дастан Сәтбаев командаластарымен бірге Гонконгке барды. Ойыншылар тоқтаған қонақүйде оны бір топ жанкүйер күтіп алды.
Австралиядағы оқу-жаттығуларын аяқтаған «Челси» футболшылары Гонконг қаласына жетті. «Ақсүйектер» 5 тамызда осында «Ювентус» клубымен жолдастық кездесу өткізеді.
Жанкүйерлер сүйікті футболшыларын көру үшін Гонконг әуежайына жиналды. «Челси» сапындағы ойыншылар ешкімді елемей өте шықса, Дастан Сәтбаев қана дүйім жұртты қуанта алды. Ол жергілікті тұрғындармен суретке түсіп, қолтаңба қалдырды.
Футболшыларды қонақүйде тосып тұрғандардың арасында қазақ жанкүйерлері де бар еді. Олар Дастанға рахмет айтып, қолына көк ту ұстатты. Жанкүйерлер түсірген видео әлеуметтік желілерде тез тарап кетті.
«Қолтаңба қалдыруға уақыт тапқан Дастан Сәтбаевқа құрметіміз шексіз. Қазақ жігіті мықты!», – деп жазды «Челсидің» Гонконгтегі жанкүйерлер парағы.
Айта кетейік, «Челси» футболшылары 8 тамызда Джакартада (Индонезия) «Миланмен», ал 9 тамызда Искандар-Путериде (Малайзия) «Джохор Дарул Такзиммен» жолдастық кездесу өткізеді. Бас бапкер Хаби Алонсо осы матчтарға Сәтбаевты қосар-қоспасы әзірге белгісіз.
