Марокконың Рабат қаласында ФИФА Президенті Джанни Инфантино, ФИФА Бас хатшысы Маттиас Графстрём және ФИФА Басқару кеңесі мүшелерінің қатысуымен кездесу өтті. Жиын барысында ұйымның ішкі процестерін жақсарту және соңғы оқиғаларға байланысты беделді қорғау мәселелері талқыланды.
Өзара қолдау мен ынтымақтастық
Кездесу қорытындысы бойынша Бас хатшы мен Басқару кеңесінің мүшелері ФИФА-ның 211 мүше-қауымдастығы тарапынан сайланған жалғыз ресми тұлға – Президент Джанни Инфантиноны толық қолдайтынын тағы бір мәрте растады. ФИФА Президенті де ұйым стратегиясын жүзеге асыруда сапалы жұмыс атқарып жатқан Бас хатшы мен ФИФА әкімшілігіне сенім білдірді.
Сондай-ақ, тараптар жұмыс тиімділігін арттыру мақсатында Басқару кеңесі мен ФИФА басшылығы арасындағы коммуникация мен өзара іс-қимылды үздіксіз жетілдіріп отыруға келісті. Жиында ФИФА Әлем чемпионаты 2026™ турнирін сәтті ұйымдастырудағы ұжымдық жұмыстың жоғары нәтижесі де ерекше атап өтілді.
FIFA Forward Enterprise (FFE) жобасы мен жіберілген қателіктер
Кездесуде жақында кері қайтарып алынған FIFA Forward Enterprise (FFE) жобасына қатысты мәселе арнайы қаралды. Ол бойынша FIFA бөлімшесінің 20 пайыз үлесін жеке инвесторға сату идеясынан бас тартқан.
Басшылық жобаны әзірлеу және талқылау кезінде олқылықтар орын алғанын мойындады. ФИФА Кеңесі мен мүше-қауымдастықтар процестен тыс қалуы дұрыс болмағаны және ақпарат БАҚ-қа тарап кеткеннен кейін де қателіктер жіберілгені айтылды.
ФИФА Кеңесі мен 211 мүше-қауымдастыққа арнайы хат жолдап, жіберілген олқылықтар үшін кешірім сұрады. Мұндай жағдайлардың қайталанбауы үшін ішкі тексеріс жүргізіліп, есеп ФИФА Кеңесінің келесі отырысына ұсынылады. FFE ұсынысы ресми түрде күн тәртібінен алынып тасталды.
Жоба кері қайтарылғаннан кейін ФИФА өзінің беделіне, адалдығына және ішкі процедураларына жасалатын кез келген шабуылдарға төзбейтінін және абыройын қорғау үшін барлық қажетті заңды шараларды қабылдайтынын мәлімдеді.
