Бүгін, 12 тамыз күні Қазақстан ұлттық құрамасының және «Қайраттың» түлегі Дастан Сәтбаев 18 жасқа толды. Дәл осы күннен бастап ол лондондық «Челси» клубының толыққанды ойыншысы атанды және ағылшындық ұжым сапында ресми түрде өнер көрсетуге заңды түрде құқық алды.
ФИФА ережелеріне сәйкес кәмелетке толмаған футболшылардың халықаралық трансферіне шектеу қойылатындықтан, Дастан өзінің 18 жасын күтуге мәжбүр болған еді. Енді, міне, кәмелеттік жасқа толуымен бірге оның лондондық клубпен жасасқан келісімшарты толық күшіне енді.
Азия мен Австралиядағы маусымалды турне
Осыған дейін «Челси» сапындағы маусымалды дайындық ойындарының барлығын Сәтбаев Англиядан тыс жерде – Австралия, Индонезия, Малайзия және Гонконгта өткізді:
Маусымалды турненің алғашқы матчында-ақ Дастан негізгі құрамда алаңға шығып, «ақсүйектер» сапындағы алғашқы голын соғып үлгерді.
Азиялық сапарда Дастан «Тоттенхэм», «Ювентус» және малайзиялық «Джохор Дарул Тазим» сияқты ұжымдарға қарсы ойындарда алаңға шығып, үлкен халықаралық тәжірибе жинақтады.
«Стемфорд Бриджтегі» алғашқы мүмкіндік
Бұған дейін шетелдік стадиондарда бағын сынаған жас шабуылшыға енді «Челсидің» өз алаңы, аңызға айналған «Стемфорд Бридж» стадионында өнер көрсету мүмкіндігі туып отыр.
Бұл тарихи сәт жақын күндері орын алуы мүмкін: 15 тамыз күні «Челси» Премьер-лига маусымы басталмас бұрынғы соңғы жолдастық кездесуін өз алаңында өткізеді. Лондондықтардың қарсыласы Испания Ла Лигасының өкілі «Реал Сосьедад» клубы.
Оқи отырыңыз: Дастан Сәтбаевтың жаңа клубы белгілі болды: инсайдер басты үміткерді атады
