Жүргізушінің тәртібіне қарай автосақтандыру бағасы өзгереді

Қазақстанда міндетті автосақтандыру бағасы жүргізушінің тәжірибесі мен көліктің ерекшеліктеріне қарай өзгеруі мүмкін. Тиісті өзгерістер Қаржы нарығын реттеу және дамыту агенттігі әзірлеген «2030 жылға дейін сақтандыру нарығын дамыту бағдарламасының» жобасында қарастырылған.

Жаңа тәсілге сәйкес, сақтандыру компаниялары бірыңғай тарифпен шектелмей, әр жүргізуші мен көліктің жеке ерекшеліктерін ескере алады. Яғни полис құны сақтандыру жағдайының орын алу ықтималдығына көбірек байланысты болады.

Сақтандыру компанияларына сыйақы мөлшерін өздерінің скоринг жүйесі арқылы есептеуге рұқсат беру жоспарланып отыр. Тәуекелді бағалау кезінде Бірыңғай сақтандыру деректер базасы мен мемлекеттік ақпараттық жүйелердегі мәліметтер пайдаланылуы мүмкін.

Полис құнын есептеу кезінде мына деректер ескерілуі ықтимал:

• көлік қолданылатын өңір.
• сақтандыру бойынша шығындар тарихы;
• көлік жүргізу мәнері;
• жол қозғалысы ережелерін бұзу фактілері;
• жүргізушінің жасы мен көлік жүргізу өтілі;
• автокөліктің жүріп өткен жолы;
• көліктің пайдалану режимі;

Осылайша, көлікті ұқыпты жүргізетін және сақтандыру бойынша шығыны аз жүргізушілер полис үшін азырақ төлеуі мүмкін. Ал тәуекелі жоғары жүргізушілер үшін сақтандыру құны қымбаттауы ықтимал.

Әзірге бұл өзгерістер бағдарлама жобасы ретінде қарастырылып жатыр. Жаңа жүйені енгізудің нақты мерзімі мен міндетті автосақтандыру құнын есептеудің түпкілікті тәртібі әлі анықталған жоқ.

Тағы да оқыңыз: Қазақстанда автосақтандыру бағасы өзгереді: кімдер көбірек төлейді.