Балаларға арналған SIM-карталар жаппай енгізіледі – Тоқаев тапсырма берді
Президент Қасым-Жомарт Тоқаев балалардың интернеттегі қауіпсіздігін қамтамасыз ету үшін балаларға арналған SIM-карталарды міндетті түрде енгізу тәжірибесін кеңінен таратуды тапсырды. Бұл туралы мемлекет басшысы республикалық тамыз конференциясында айтты.
Тоқаевтың сөзінше, мұндай SIM-карталар балалардың интернеттегі қауіп-қатерден қорғалуына және олардың «ақпараттық иммунитетін» қалыптастыруға мүмкіндік береді.
«Сондықтан балаларға арналған міндетті SIM-карталарды енгізу тәжірибесін жаппай таратуды тапсырамын. Бұл олардың ақпараттық иммунитетін қамтамасыз ете алады», – деді президент.
Балаларды интернеттегі зиянды контенттен қорғау
Мемлекет басшысы әлеуметтік желілер, цифрлық платформалар, жасанды интеллект және агрессивті маркетингтің балалардың дүниетанымына әсері күшейіп келе жатқанын атап өтті.
Оның айтуынша, өскелең ұрпақтың психологиялық саулығы, эмоциялық тұрақтылығы мен адамгершілік тәрбиесі елдің ұлттық қауіпсіздігі мен тұрақты дамуына тікелей әсер етеді.
Президент осыған байланысты 2018 жылы қабылданған балаларды денсаулығы мен дамуына зиян келтіретін ақпараттан қорғау туралы заңды қайта қарап, оған елеулі өзгерістер енгізу қажет екенін айтты.
Сондай-ақ Үкімет 16 жасқа толмаған балалардың әлеуметтік желілерде тіркелуіне тыйым салуды көздейтін заң жобасын әзірлеген. Құжат биыл маусымда парламент қарауына ұсынылған.
Тоқаев балаларды зиянды контенттен қорғау үшін контентті сүзгіден өткізу шараларын күшейту қажет екенін айтты.
«Белгілі бір, мейлінше объективті себептерге байланысты жауапкершілікті ата-аналарға ғана артып қоя алмаймыз», – деді Қасым-Жомарт Тоқаев.
Президенттің пікірінше, балалардың психологиялық жай-күйіне төнетін қауіптің салдарымен күресіп қана қоймай, оның алдын алуға басымдық беру керек.
Сондай-ақ президент балалардың денсаулығына әсер ететін факторларға назар аударып, фаст-фудтың кеңінен жарнамалануына алаңдаушылық білдірді.
