Қазақстандық турист Непалдағы су тасқынынан кейін хабар-ошарсыз кетті

Непалда болған алапат су тасқынынан кейін Қазақстан азаматы хабар-ошарсыз кеткендер тізіміне енді. Табиғи апат салдарынан кемінде 273 адам қаза тапқан. Бұл ақпаратты ҚР Сыртқы істер министрлігі мәлімдеді.

Не белгілі?

Алдын ала мәлімет бойынша, қазақстандық әйел туристік топ құрамында болған және топпен бірге Непал аумағынан Қытайға өткен. Осыдан соң ол хабар-ошарсыз кеткен. Қазір оның қай жерде екені белгісіз.

«Қазіргі уақытта азаматшамыздың қай жерде екені белгісіз. Хабар-ошарсыз кеткендерді іздеу жұмыстары жүргізіліп жатыр. Қазақстандық дипломаттар жергілікті мемлекеттік органдармен жұмысты жалғастыруда», – деді ҚР Сыртқы істер министрлігінің ресми өкілі Жанболат Үсенов «Курсивке» берген түсініктемесінде.

Оқиғаның басқа да мән-жайлары әзірге белгісіз. Туристік топтың шекарадан өткен уақыты мен қазақстандық әйелдің жоғалып кеткен сәті туралы ақпарат жоқ.

Бұған дейін Непал мен Қытай шекарасында болған алапат су тасқынынан кейін жүздеген туристің хабар-ошарсыз кеткендер қатарында екені хабарланған болатын. Непал билігінің мәліметінше, табиғи апаттан 160-тан астам адам қаза тапқан. Ал із-түзсіз кеткендердің тізімінде 579 турист болған, оның ішінде 28 елден келген 466 шетелдік бар.

Табиғи апат 26 тамызда Расува таулы аймағында болған. Су, лай мен тасқын ағыны үйлерді, жолдарды, көпірлерді және басқа да инфрақұрылым нысандарын қиратып кеткен.

Бастапқыда СІМ Непал мен Қытай шекарасы ауданында болған су тасқынынан зардап шеккендер мен хабар-ошарсыз кеткендер арасында қазақстандықтардың жоқ екенін мәлімдеген еді.