Гүл сыйлауға тыйым және 45 минут сынып сағаты: 1 қыркүйекте оқушыларды не күтіп тұр

Қазақстанның білім беру ұйымдарында 1 қыркүйекте дәстүрлі бірыңғай сынып сағаты өтеді, алайда мектеп қабырғасында мұғалімдерге гүл шоқтарын табыстайтын дағдылы салтанатты жиындар шектеледі, деп хабарлайды Кursiv.Media.

Барлық сыныптар үшін бірыңғай формат

Журналистердің Білім күнін мерекелеу форматы туралы сұрақтарына жауап бере отырып, Оқу-ағарту вице-министрі Шынар Ақпарова іс-шаралар ерекшеліксіз барлық оқушыларға қатысты болатынын нақтылады.

«1 қыркүйекте мектепте бірыңғай сынып сағаттары, ал колледждерде кураторлық сағаттар өтеді. Олар барлық білім беру ұйымдарында ұйымдастырылады. Олардың ұзақтығы шамамен 45 минутты құрайды», – деп хабарлады Шынар Ақпарова.

Гүлдер мен сыйлықтарға – тыйым

Брифинг барысында педагогтерге гүл шоқтары мен құнды сыйлықтар тарту ету дәстүріне ерекше назар аударылды. Министрлікте жергілікті атқарушы органдар мен әкімдіктердің мекенжайына ресми нұсқаулық хаттар жіберілгені атап өтілді.

«Мектеп қабырғасында мұғалімдерге гүл сыйлауға немесе қандай да бір сыйлықтар сатып алуға жол берілмейді. Біз бұны бөлек жаздық. Бұған ешқандай қажеттілік жоқ. Барлық білім беру ұйымдарында дәстүрлі сыныптық және кураторлық сағаттар өтуі тиіс», – деп тағы да атап өтті ол.

Айта кетейік, бүгін Құрылтай сессиясында Тоқаев 16 жасқа дейінгі балалардың әлеуметтік желіге тіркелуіне тыйым салуды қолдайтынын айтқан. Енді осы мәселеге қатысты заң жобасы әзірленуі керек.