Ресей әскери базасын әкетсе, Армения қарсы болмайды – Никол Пашинян

Ресей өз әскери базасын ел аумағынан шығаруға шешім қабылдаса, Ереван бұған қарсылық білдірмейді деп хабарлайды Kursiv.Media.

 «Арменпресс» агенттігінің хабарлауынша, Армения премьер-министрі Никол Пашинян осылай мәлімдеме жасаған.

«Біз осы уақыт ішінде Ресейдің әскери базасы мәселесін бірде-бір рет көтерген жоқпыз. Оның себебі – Армения аумағында Ресейдің 102-ші әскери базасының болуы біз үшін өмірлік маңызы бар деп санайтынымызда емес», – деді Пашинян.

Оның айтуынша, Мәскеу әскери базаны шығару туралы шешім қабылдаса, Армения оған кедергі келтірмейді. Ал Мәскеу базаның жұмысын жалғастырғысы келсе, Ереван Ресей тарапымен оны сақтау мүмкіндігін талқылауға дайын.

Александр Невский орденді Ресейдің 102-ші әскери базасы Гюмри және Ереванда орналасқан.

Айта кететін жайт, Армения парламентіндегі «Азаматтық келісім» фракциясының депутаты Саргис Ханданян «біздің ҰҚШҰ-дағы қатысуымызды қайта жандандыруға мәжбүрлейтін ешқандай себеп немесе жағдай жоқ» деп мәлімдеген еді.