Geely Monjaro-ның ең үлкен нұсқасы шықты: ұзындығы 5 метрге жуық
Қытайда Geely Monjaro Plus кроссовері таныстырылды. Қытай нарығында бұл модель Xingyue L Plus атауымен белгілі, деп хабарлайды Kursiv.media.
Көлемі ұлғайып, ұзара түсті
Autohome басылымының мәліметінше, жаңа нұсқаның көлемі ұлғайып, салоны жаңартылған. Monjaro Plus көлігінің габариттері – 4955×1960×1769 мм, ал дөңгелегі – 2900 мм. Кроссовердің ұзындығы Қазақстанда қазір сатылып жатқан «Монджароға» қарағанда 185 мм-ге, ал осьтер арасы 55 мм-ге ұзарған. Жүксалғыштың көлемі 740 литрге жетеді.
Алдыңғы бөлігінде тік хром элементтері бар жаңа радиатор торы мен өзгертілген жарық техникасы пайда болды. Артқы жағында бір-бірімен жалғасқан шамдар орнатылған. Бүйір бөлігінде ерекше дизайндағы дөңгелек дискілері көзге түседі.
Лидар және 27 датчик
Көліктің басты ерекшеліктерінің бірі – жүргізушіге көмектесетін Qianli Haohan H5 интеллектуалды жүйесі. Көліктің төбесіне лидар орнатылған. Ал жүйенің жұмысын 27 жоғары сезімтал датчик пен Nvidia Orin-Y есептеу платформасы қамтамасыз етеді. Кешен көлік жүргізу және тұраққа қою кезінде бірқатар функцияларды автоматтандыруға арналған.
Жаңа салон
Салон дизайны да айтарлықтай жаңартылған. Жүргізуші мен алдыңғы жолаушының алдына үлкен экрандар орнатылып, олар цифрлық аспаптар панелі және алдыңғы әйнекке ақпарат шығаратын проекциялық дисплеймен толықтырылған.
Жабдықтар тізіміне электронды трансмиссия селекторы, Super EVA дауыстық және интеллектуалды өзара әрекеттесу жүйесі, анатомиялық пішіндегі орындықтар және 23 динамигі бар Flyme Sound аудиожүйесі кіреді.
Артқы жолаушылар үшін реттелетін орындықтар, жиналмалы үстелшелер және жеке желдету дефлекторлары қарастырылған. Сондай-ақ көлікке тоңазытқыш пен массаж функциясын қосуға болады.
Қытайға арналған гибрид
Xingyue L Plus көлігі 2 литрлік турбомоторы бар i-HEV гибридті жүйемен жабдықталған. Қозғалтқыштың қуаты – 218 ат күші, ал трансмиссиясы – 3DHT. Кроссовердің максималды жылдамдығы 190 км/сағ-қа жетеді.
Кроссовер тәуелсіз аспамен және артқы дөңгелектерді бұруға мүмкіндік беретін жүйемен жабдықталған. Соның арқасында көліктің бұрылу радиусы 4,88 метрді құрайды. Кейбір жинақтамаларында клиренсі өзгеретін пневматикалық аспа да ұсынылады.
Қазақстан нарығына қашан шығады
Geely Monjaro-ның Қазақстандағы бренд модельдерінің арасында өзіндік орны бар. Қазір бұл модель 2 литрлік турбомотормен, 8 сатылы автоматты беріліс қорабымен және толық жетекті жүйемен ұсынылады. 2026 жылғы шілдеде жаңартылған нұсқаның бағасы 16,6 млн теңгеден басталады.
Алайда Xingyue L Plus-ты әзірге Қазақстанға арналған болашақ нұсқа деп қабылдауға болмайды. Әртүрлі нарықтарға арналған көліктің жабдықталуы мен күштік қондырғылары бір-бірінен ерекшеленуі мүмкін. Оның үстіне Geely жаңа модельдің Қытайдан тыс нарықтарға қашан шығатынын әзірге жариялаған жоқ.
Тағы да оқыңыз: Қазақстандықтар Geely-дің гибрид көлігін көбірек таңдай бастады
