Төменгі шектің өсуі тосқауыл болмады: халық зейнетақы жинағын белсенді жұмсап жатыр

2026 жылғы тамызда тұрғын үй жағдайын жақсартуға арналған біржолғы зейнетақы төлемдері 27,5 млрд теңге болды. Бұл шілдедегі 27,1 млрд теңгемен шамалас, деп хабарлайды Kursiv.Media.

Бірінші кредиттік бюроның мәліметінше, маусым айынан бастап зейнетақы жинағын пайдалануға мүмкіндік беретін ең төменгі шегі қайта есептелді. Соның нәтижесінде жинағынан ақша ала алатын азаматтардың саны айтарлықтай азайды.

Алайда қаражатын пайдалануға мүмкіндігі бар адамдардың қолжетімді сомасы, керісінше, өсті. Бұған қарамастан, шілде мен тамызда мыңдаған қазақстандық зейнетақы жинағының бір бөлігін пайдаланды.

1 шілде мен 1 тамыз аралығында алушылар саны 8,8 мың адамға, ал 1 тамыз бен 1 қыркүйек аралығында тағы 8,8 мың адамға көбейді. Бұл көрсеткіштерді өткен жылдармен салыстыру қиын.

Себебі бұрын БЖЗҚ орындалған өтінімдер санын жарияласа, қазір нақты алушылар санын көрсетеді. Мысалы, 2025 жылы ай сайын орта есеппен 100 мыңнан астам өтінім орындалған. 2026 жылдың қаңтар–мамырында бұл көрсеткіш орта есеппен 58 мың болды. Зейнетақы жинағын пайдаланудың ең танымалы үй сатып алу кезінде түпкілікті есеп айырысу болған.

Шілде мен тамызда осы мақсатқа төленген қаражаттың 58%-ы бағытталды. Сонымен бірге пайдаланылмаған зейнетақы қаражатының БЖЗҚ-ға қайтарылуы да жалғасып жатыр.

Тамызда қорға шамамен 4,9 млрд теңге, ал шілдеде 10 млрд теңге қайтарылған. Зейнетақы ақшасы азамат өз шешімінен бас тартса, қажетті құжаттарды ұсынбаса немесе қаражатты белгіленген мақсатқа пайдаланбаса, БЖЗҚ-ға қайта түседі.

Сондай-ақ бүгіннен бастап зейнетақы жинағының 100%-ын жеке басқарушыға беруге болады.