Apple компаниясы iOS 18.2 нұсқасын шығарды. Бұл жаңартуда ChatGPT, жаңа Image Playground (Сурет алаңы) қосымшасы және эмодзи генераторы Genmoji енгізілді.
ChatGPT мен Siri мүмкіндіктері
iOS 18.2-ден бастап OpenAI жасаған ChatGPT-ді тікелей Siri арқылы немесе түрлі қосымшалардағы Writing Tools (Жазу құралдары) функциясымен қолдануға болады.
Writing Tools жаңа мәтіндерді нөлден бастап ChatGPT көмегімен құрастыруға мүмкіндік береді. Бұл функцияны пайдалану үшін Siri параметрлерінен Apple Intelligence қызметін қосу қажет (смартфон мен Siri тілі ағылшын болуы керек). ChatGPT мәтіндік сұраныстар кезінде қазақ тілінде де жауап бере алады.
Егер Siri сұрағыңызға жауап беру үшін қосымша көмек қажет деп санаса, ол автоматты түрде ChatGPT-ке қосылады. Бұл жағдайда ChatGPT аккаунты қажет емес және сұранымдарыңыз анонимді түрде өңделеді. Бірақ өз есептік жазбаңызбен кірсеңіз, OpenAI деректер саясатына сәйкес қосымша мүмкіндіктерді пайдалана аласыз.
Image Playground қосымшасы
Жаңа Image Playground қосымшасы Apple Intelligence технологиясының негізінде жұмыс істейді. Бұл фотосуреттерді әртүрлі стильде жасауға және бейнелер өңдеуге мүмкіндік береді.
Мұнда анимация немесе иллюстрация стилін таңдап, бейнелерді оңай монтаждауға болады. Бұл функцияны Messages, Freeform сияқты Apple қосымшаларында пайдалануға болады. Жасалған суреттер iCloud арқылы барлық құрылғыңызда сақталады.
Genmoji: жеке эмодзи генераторы
iOS 18.2-де енгізілген Genmoji функциясы жеке эмодзилер жасауға мүмкіндік береді. Бұл үшін Apple Intelligence қызметін қосып, эмодзи пернетақтасында Genmoji батырмасын басу керек. Ағылшын тілінде сипаттама жазсаңыз, жүйе сізге қалауыңызға қарай эмодзи жасап береді. Бұл эмодзилерді Messages қосымшасы мен басқа платформаларда да жіберуге болады. Бірақ Genmoji тек iPhone 16 құрылғысында ғана бар.
Камерадағы жаңа функциялар
iOS 18.2 камераға бағытталған объектілер туралы жылдам ақпарат алуға мүмкіндік береді. Бұл үшін камера басқару батырмасын ұзақ басу арқылы жаңа қызметті қосуға болады. Мысалы, iPhone камерасын бір нысанға бағыттасаңыз, Siri немесе ChatGPT арқылы камерадағы обьектілер туралы ақпарат алуға болады.
Еске сала кетейік, бұған дейін Kursiv LifeStyle жаңа iPhone 16 алу үшін қазақстандықтар қанша жалақысын жұмсауы керектігін есептеп көрген. Елдегі орташа айлық жалақы 382 мың теңге болса, қазақстандықтар жады 1TB жаңа телефонды алу үшін үш айдан астам уақыт жұмыс істеуге мәжбүр болады.
