Енді Алматыдағы «Медеу» биік таулы мұз айдынын онлайн бақылау мүмкіндігі бар. Мұз айдынының ресми сайтында онлайн-камера арқылы адамдар көптігін және ауа райын алдын ала көруге болады.
Мұз айдыны дирекциясының мәліметінше, бұл мүмкіндік қонақтарға уақытын тиімді жоспарлап, мұз айдынына бару үшін қолайлы уақытты таңдауға көмектеседі.
«Бұл жаңашылдық мұз айдынына баруды тиімді жоспарлауға және қолайсыздықтарды болдырмауға мүмкіндік береді. Сондай-ақ жаппай сырғанау билеттерін ресми сайт арқылы алдын ала сатып алуға болатынын еске саламыз. Бұл кассалардағы кезектерден құтылып, қонақтардың уақытын үнемдеуге көмектеседі», – деп мәлімдеді мұз айдыны дирекциясы.
Айта кетейік, биылғы жаппай сырғанау маусымының ресми ашылуы 2 қарашада өтті. Жаңа маусымда қонақтар үшін күнделікті сырғанау сеанстары ұйымдастырылған. Мұз айдыны бір уақытта мұз үстінде 3 500 адамды қабылдай алады.
