Шымкент қаласының әкімдігі орталық саябақтан 4 гектар жер телімін заңсыз пайдалану дерегіне байланысты сотқа жүгініп, жеңіп шықты. Бұл туралы Жоғары сот хабарлады.
Бұған дейін 2011 жылы аталған жер телімі жекеменшік серіктестікке (ЖШС) балалар орталығын салу мақсатында жалға берілген болатын. Алайда жалға алушы міндеттемесін орындамай, оның орнына «Қиял әлемі» ойын-сауық саябағын салған.
Қауіпсіздік талаптарының бұзылуы
Соңғы жылдары бұл орында бірнеше төтенше оқиға орын алған. Өрт шығу фактілері тіркеліп, екі студент пен бір адам қаза болған қайғылы оқиға орын алды. Осыған байланысты әкімдік ЖШС-ның жалдау шарттарын бұзғанын алға тартып, жер телімін коммуналдық меншікке қайтаруды талап етті.
Сот шешімі қандай?
Сот процесінде ЖШС саябақ аумағында заңсыз салынған құрылыстарды пайдалануға рұқсат алу актілерін заңда белгіленген тәртіппен ресімдемегені анықталды. МАЭС және апелляциялық сот әкімдік талаптарын қанағаттандырып, 4 гектар жер телімін мемлекет меншігіне қайтару туралы шешім шығарды.
Бұл шешім заңды күшіне енгеннен кейін, әкімдік ЖШС есебінен заңсыз салынған аттракциондар мен құрылыстарды бұзу және жерді бастапқы қалпына келтіру туралы талаппен сотқа жүгінді. Сот әкімдіктің талаптарын толық қанағаттандырып, ЖШС-ны аумақты босатып, оны бастапқы күйіне келтіруді міндеттеді.
