Әнші Мирас Жүгінісовтің 7 қыркүйек күні Алматыдағы Орталық стадионда өтуі тиіс болған үлкен концерті кейінге қалдырылды. Бұл туралы Мирас өзінің парақшасында жариялады.
Ұйымдастырушылардың айтуынша, белгілі бір себептерге байланысты концерт жақын арада басқа күнге шегеріліп отыр.
«Бұл шешімді қабылдау біз үшін оңай болған жоқ. Тыңдармандарымызға ең жоғары деңгейде шоу сыйлау – басты мақсатымыз. Сол үшін барлық дайындықты сапалы өткізу мақсатында уақытты қайта қарастыруға мәжбүр болдық», – делінген ресми хабарламада.
Әнші жанкүйерлерінен күтпеген жағдайға байланысты кешірім сұрап, түсіністікпен қарауды өтінді. Сонымен қатар, сатып алынған барлық билеттер жаңа күнге жарамды болатыны және нақты мерзімі қосымша хабарланатыны айтылды.
Мирас Жүгінісов тыңдармандарымен ұмытылмас музыкалық кеште жолығатынын айтып, алдағы хабарламаларды ресми парақшалардан бақылап отыруды сұрады.
Жаңа күн мен толық ақпарат алдағы уақытта жарияланатын болады.
Еске сала кетейік, бұған дейін Алматының Орталық стадионында 6 қыркүйекке жоспарланған Макс Корждың да концерті өтпейтін болды.
