Қарақат Әбілдина Air Astana әуекомпаниясынан өтемақы талап етпек. Өйткені, Қыдырәлі Болманов екеуі Алматыдағы шараға жете алмай қалған.
Айтуларынша, олар ұшақтың ұшу уақытын бірнеше мәрте ауыстырғандықтан, ақысы төленген, алдын ала жоспарланған іс-шарадан қалып қойған. Жұлдызды жұп Астана әуежайында бір күн өткізгенін мәлімдеді.
«Уайымдап күні бойы босқа отырған жоқпыз. Басқа әуе желісі арқылы ұшып кетейін десек, билет таппадық. Бізге кешігуге болмайды деп өздеріне айтып жатырмыз. «Басқа қандай нұсқалар, амалдар бар» дегенде қам жеген, беті бүлк еткен адамды көрмедік. Бұл – жолаушыларға деген қарым-қатынас. Жауапкершіліктің жоқтығы», – деп сын айтты Қарақат Әбілдина.
Мұның кесірінен әнші қаржылық мәселе туындағанын да жасырмады. Қарсы тарап төлеген ақшасын қайтаруды, шығындарды толық өтеуді талап еткен.
«Шақырушы тараптың қандай кінәсі бар? Талаптарға сай шарттарды орындады. Бүгінгі күні қаншама шығынды бізден талап етіп отыр. Біздің кінәміз не? Air Astana әуекомпаниясы кесірінен екі тарап сан-сұрақтың астында қалып отырмыз. Бұған компанияның қатысы жоқ па?» – дейді әнші.
Айта кететін жайт, кеше кешке Қарақат Әбілдина күндізгі он екіден бастап әуежайда жүріп, бір күнін өткізгеніне шағымданған.
«Air Astana әуекомпаниясына сөгіс жариялаймын. Бүгін шектен шыққан күн болды. Әуежайда күтумен бір күніміз өтті. Бір жарымда ұшу керек болған ұшақты енді «20.40-та» деді. Сосын «22.10 да ұшасыз» деді. Енді түнгі сағат тілі 11-ден кетті. Енді отырғызып жатыр. Демек, Алматыда болатын іс-шарадан қалып қойдық. Бізді күткен адамдар да өте ашулы. Осылай жасауға бола ма?» – деп қатуланды Қарақат Әбілдина.
Қыдырәлі Болманов та бейнежазба арқылы Алматыда күткен адамдардан кешірім сұрады.
«Біз бұрын мұндай жайттарға көз жұма қарап келген едік. Енді мәселе көтергім келеді. Адамдардың уақытымен неге санаспайсыздар?» – деп, жұлдызды жұп компаниядан өтемақы талап ететіндерін жеткізді.
Сонымен қатар, Қарақат Әбілдина мұның алдында туған күнінде берілген ең қымбат сыйлықты атаған еді.
