Қазақстанда қытайлық JAC маркасының автокөліктері арзандады. Енді модельдер қатарындағы ең қолжетімді көлік 7,5 миллион теңгеден басталады, ал сатып алушылар үшін ең жоғары жеңілдік 2,6 миллион теңгеге дейін жетеді. Бұл туралы JAC Kazakhstan компаниясы Kursiv Auto басылымына таратқан ресми хабарламасында мәлімдеді. Жаңартылған баға тізімі дистрибьютордың ресми сайтында жарияланды.
JAC J7 және J7 Plus арзандады
Лифтбек JAC J7 енді 8,9 миллион теңгеден басталады – бұл бұрынғы бағадан 800 мың теңгеге арзан. Ал кеңейтілген нұсқадағы J7 Plus 1,1 млн теңгеге арзандап, 9,59 млн теңгеден сатылымға шықты.
JAC кроссоверлеріне жеңілдіктер
Кроссоверлер қатарында ең қолжетімдісі – JAC JS4. Оның бастапқы бағасы 8 млн теңге, жеңілдік көлемі – 900 мың теңге.
Орташа көлемдегі JS6 моделі ең үлкен жеңілдікпен ұсынылуда – 2,6 млн теңге, бастапқы бағасы – 8,9 млн теңге.
Жеті орынды JS8 1,5 млн теңгеге арзандап, 11,6 млн теңгеден басталады.
Ал JS5 кроссовері 2,1 млн теңгеге төмендеп, 8,6 млн теңгеден сатыла бастады.
Электромобиль JAC EJ-7
Электр қуатымен жүретін JAC EJ-7 де арзандады. Енді оны 12,29 млн теңгеден сатып алуға болады – бұл бұрынғы бағадан 700 мың теңгеге арзан.
Қазақстандағы ең арзан JAC моделі – S3 Pro
Қазақстан нарығындағы JAC брендінің ең қолжетімді нұсқасы – шағын кроссовер S3 Pro, оның бағасы 7,49 миллион теңгеден басталады.
Сонымен қатар, сатылымға жаңа логотиппен жаңартылған J7, J7 Plus және JS8 модельдері шықты.
Бағалардың төмендеуі жеңілдікпен берілетін несиелер арқылы сатып алынатын көліктерге де таралады.
JAC бренді Қазақстанда 2015 жылдан бері жұмыс істейді.
