Шри-Ланка әуежайында жүктерінен 112 келі каннабис табылған жиырма екі монах тұтқындалды. Бұл туралы Daily Mirror басылымы хабарлады.
Мәселенің мәні
Есірткіге қарсы күрес бюросының қызметкерлері күдіктілерді 25 сәуір күні кешке Таиландтан ел астанасына ұшып келген бойда ұстаған. Жедел ақпарат негізінде тексеру жүргізген полиция монахтардың сөмкелеріндегі арнайы жасырын орындардан жалпы салмағы 112 килограмм есірткіні тапты.
Бұл Шри-Ланка астанасындағы Бандаранаике халықаралық әуежайы тарихында тәркіленген ең ірі партия болып тіркелді. Есірткінің нарықтық құны шамамен 3,5 миллион долларды құрайды.
Монахтар қалай алданған?
Тергеу барысында бұл трафикті үш монах ұйымдастырғаны анықталды. Олар қалған 19 адамды әлеуметтік желі арқылы жинаған. Топ Таиландқа 22 сәуірде аттанған екен.
Күдіктілердің көбі – 30 жасқа толмаған, жоғары оқу орындарында білім алып жатқан жас монахтар. Оларды мынадай уәделермен қызықтырған:
- Тегін авиабилеттер;
- Тегін жатын орын мен тамақ;
- Сөмкелерде мектеп оқушыларына арналған «оқу құралдары мен тәттілер».
Алайда полиция әр сөмкеден 5 келіден есірткі тапты. Сонымен қатар, кейбір монахтардың телефондарынан олардың ғибадатханадан тыс жерде, күнделікті киіммен демалып жүрген суреттері мен видеолары табылған.
Тергеу мәліметінше, бұл топ өткен айда 12 монахтың қатысуымен дәл осындай операцияны сәтті жүзеге асырған. Сондай-ақ, олар жақын арада тағы бір сапарды жоспарлап отырған екен.
Қазіргі уақытта Шри-Ланканың есірткіге қарсы күрес бюросы бұл іске қатысы бар басқа да тұлғаларды анықтау үстінде.
