Apple компаниясының iPhone 17 сериясы тарихтағы ең танымал модельдердің біріне айналып, сатылым көлемінің айтарлықтай артуына ықпал етті. Жаңа смартфондарға сұраныс өте жоғары болды, бұл Apple-дің күтілген нәтижеден де жоғары көрсеткішке қол жеткізуіне мүмкіндік берді.
Apple табысы Financial Times дерегіне сәйкес, наурыз айымен аяқталған үш айлық кезеңде 111,2 млрд долларды құрады. Бұл көрсеткіш жылдық есепте шамамен 17%-ға артқан және Уолл-стриттің болжамынан жоғары болды. iPhone сатылымы 20%-дан астам өсіп, 57 млрд долларға жетті. Бұл өсімнің негізгі факторы осы болды.
Компания басшысы Тим Кук iPhone 17-ге деген сұранысты «ерекше жоғары» деп атады. Оның айтуынша, дәл осы сұраныс осы кезең үшін рекордтық нәтижелерге қол жеткізуге себеп болған. Компанияның қаржы директоры Кеван Парех қазіргі смартфондар желісі компания тарихындағы ең танымал серияға айналып, нарықтағы үлесті арттыруға көмектескенін айтты.
Сонымен қатар Қытай нарығы ерекше бөлініп отыр. Бұл өңірдегі Apple табысы 20,5 млрд долларды құрап, жылдық есепте 28%-ға өскен.
Сонымен қатар Apple-дің Mac компьютерлерінен түскен табысы 8,4 млрд долларды құрап, өткен жылмен салыстырғанда шамамен 6%-ға артқан. Бұл өсімге бағасы 599 доллар болатын қолжетімді MacBook Neo ноутбугінің шығуы себеп болғаны айтылады. Айта кетейік, ол 2026 жылдың наурыз айында таныстырылған.
Басылымның хабарлауынша, iPhone 17 желісінің табысты сатылымынан кейін Apple осы күзде жиналмалы смартфон ұсынуды жоспарлап отыр.
Еске салсақ, осыған дейін, Apple компаниясы 17-буындағы ең арзан өнімі – iPhone 17e смартфонын таныстырған болатын.
