Алматыда серуендеуге арналған тағы бір саябақ ашылды. Көктөбе саябағы аумағында 4 гектар жерді көгалдандыру жұмыстары аяқталды. Енді тұрғындар мен қала қонақтары ол маңда серуен құрып, Алматы мен Іле Алатауы сұлулығын тамашалай алады.
«Жобаның басты ерекшелігі – тау бөктеріндегі лаванда террасалары. Бұл жерге ерте көктемнен күз соңына дейін сәнін жоғалтпайтын 20-дан астам көпжылдық өсімдік, бұта мен астық тұқымдас өсімдіктер егілген. Сондай-ақ гортензия, тобылғы, шатыраш (шалфей), көкжалбыз (котовник), қызылкүрең де бар», – делінген әкімдік таратқан ақпаратта.
Азаматтардың серуені жайлы болуы үшін баспалдақтар мен айналаны асықпай тамашалауға болатын алаңдар да салынған.
Айта кетейік, бұдан бөлек Гоголь және Байтұрсынов көшелерінің қиылысында орналасқан бұрынғы трамвай депосының орнына креативті кластер салынатын болды.
