Қазақстанда биыл тоғыз айда кеден ережесін бұзған компаниялардан өндіру жұмыстары жүргізілді. Қаңтар-қыркүйек айларында жүргізілген 948 тексерудің 84%-ында заң бұзу анықталған. Тексеру нәтижесінде мемлекетке қосымша 29,6 млрд теңге төлеу есептеліп, оның 19,6 млрд теңгесі өндірілді, деп хабарлайды Kursiv.media.
Ең жиі кездескен заң бұзу тауардың кедендік құнын дұрыс көрсетпеуге қатысты болған. Мұндай жағдайлар анықталған бұзудың 40%-ын құрайды.
Тағы 20%-ында тауарлар кедендік құжаттарда қате жіктелген. Ал 17%-ында пайдалануға шектеу қойылған тауарлар белгіленген мақсаттан тыс қолданылған. Кедендік рәсімдердің талаптарын бұзу жағдайлары 5%-ды құраған.
Заң бұзу көбіне цифрлық майнинг саласында жұмыс істейтін компаниялардан анықталған. Олардың үлесі 19%-ды құрады. Көтерме саудамен айналысатын кәсіпорындар арасында бұл көрсеткіш 16,2%, көтерме және бөлшек саудада 13,5%, энергетикалық сусын өндірушілер арасында 4% болған.
Тексеру қорытындысы бойынша компанияларға қосымша кедендік төлемдер, салықтар мен өсімпұлдар есептеліп, декларацияларына түзетулер енгізіледі.
Заң бұзғандарға қатысты жауапқа тарту шаралары да қабылданады.
Қазір Қытайдан жалпақ металл прокатын әкелетін бірқатар компания тексеріліп жатыр. Оларға демпингке қарсы бажды толық төлемеуі мүмкін деген күдік бар.
Тағы да оқыңыз: Салық органдары майнинг компанияларын тексеріп жатыр
