Шығыс Қазақстан облысындағы «Рахман қайнары» шипажайын одан әрі дамыту мақсатында инвестордың сенімгерлік басқаруына беру мәселесі пысықталып жатыр. Бұл туралы премьер-министрдің орынбасары-ұлттық экономика министрі Серік Жұманғарин санаторий-курорттық саланы дамыту мәселелеріне қатысты депутаттардың сауалына берген жауабында айтқан, деп хабарлайды Kursiv.Media.
Құжатта санаторий-курорттық әлеуетті дамыту, табиғи емдік ресурстарды тиімді пайдалану және салаға инвестиция тарту мәселелеріне ерекше назар аударылған.
Үкіметтің мәліметінше, санаторий-курорттық ұйымдардың жобаларын іске асыратын инвесторларға бірқатар мемлекеттік қолдау шаралары қарастырылған.
Олардың қатарында салықтық және инвестициялық преференциялар, кредиттер бойынша пайыздық мөлшерлемелерді субсидиялау, сондай-ақ инженерлік-коммуникациялық инфрақұрылымды жеткізу тетіктері бар.
Инвесторға беру шипажайдың дамуына қалай әсер етуі мүмкін
Шипажайды сенімгерлік басқаруға беру мәселесі оның инфрақұрылымын жаңғыртуға, қызмет көрсету сапасын арттыруға және емдік-сауықтыру туризмінің әлеуетін кеңейтуге мүмкіндік беретін тетіктердің бірі ретінде қарастырылуы мүмкін. Қазақстанда санаторий-курорттық саланы дамыту аясында инвесторларды тарту және табиғи емдік ресурстарды тиімді пайдалану бағытында жұмыстар жүргізіліп жатыр.
Үкіметтің ресми жауабында да «Рахман қайнары» шипажайын инвесторға сенімгерлік басқаруға беру мәселесі пысықталып жатқаны нақты көрсетілген. Қазақстанда 333 санаторий-курорттық ұйым жұмыс істейді. Үкімет олардың бірыңғай тізілімін қалыптастыруды көздейтін заңнамалық түзетулер әзірледі. Ұлттық статистика бюросының дерегіне сәйкес, санаторийлердің ең көбі Түркістан облысында орналасқан. Өңірде 117 ұйым бар. Алматы қаласында – 34, Алматы облысында – 22, Ақмола облысында – 20, Шымкентте – 20 санаторий жұмыс істейді.
Үкіметтің мәліметінше, қазіргі есеп жүйесі санаторийлердің материалдық-техникалық базасы, төсек-орын қоры, жүктемесі және пайдаланатын табиғи емдік ресурстары туралы толық ақпарат алуға мүмкіндік бермейді. Сондықтан бірыңғай тізілім құру мәселесі қарастырылып жатыр. Тиісті түзетулер Құрылтайда қаралып жатқан заң жобасына енгізілген.
Елде емдік табиғи ресурстардың қоры бар
2026 жылғы 1 қаңтардағы жағдай бойынша Қазақстанда жалпы қоры тәулігіне 64,6 мың текше метр болатын жерасты минералды суларының 78 кен орны есепте тұр. Олардың 47-сі пайдаланылып жатыр. Сондай-ақ жалпы қоры 456,3 мың текше метр болатын емдік балшықтың сегіз кен орны бар. Олардың ірілері – Алматы облысындағы Тұзкөл, Қарағанды облысындағы Қарасор көлі және Павлодар облысындағы Мойылды көлі.
«Сосновый бор» санаторийі «Өрлеу» бағдарламасы бойынша 598 млн теңге мөлшерінде жеңілдікті кредит тартты. Солтүстік Қазақстан облысында «Шалқар Су» санаторийінің (1 млрд теңге) және 500 төсек-орындық кешеннің (2,5 млрд теңге) жобалары іске асырылып жатыр. Абай облысында Шипалы көліндегі санаторий жобасы (4 млрд теңге), Түркістан облысында 2026 жылы 2,5 млрд теңгеге 5 емдеу-сауықтыру ұйымы іске қосылды. «Рахман қайнары» санаторийін инвесторға сенімгерлік басқаруға беру пысықталып жатыр» , – делінген жауапта.
«Рахман» шипажайы қашқын олигарх Анатолий Балушкинге тиесілі болған. Ол істі болған соң шипажай мемлекет меншігіне өтеді. Алайда бірнеше жыл қатарынан жұмыс істемей тұрды. ШҚО әкімдігі «Рахман қайнары» шипажайының даму жоспары жайлы да айтқан болатын. Жеке инвесторларға беру мәселесі осыған дейін де көтерілген еді.
Оқи отырыңыз: Қашқын кәсіпкер Балушкиннен мемлекетке өткен санаторий бюджет есебінен жөнделеді
