Қарағанды ферроқорытпа зауыты өнімді сату географиясын 15 елге кеңейтті

«YDD Corporation» ферроқорытпа зауыты экспорттық әлеуетті дамыту жұмыстарын белсенді жалғастыруда. Ағымдағы жылы өнімді сату географиясы 15 елге кеңейтілді. Осылайша, қазіргі уақытта зауыт әлемнің 37-ден астам еліне өнім экспорттайды. Осы бағыттағы негізгі нарықтар Жапония, Оңтүстік Корея, Еуропа, Америка және т. б. Бұл туралы ҚР Индустрия және инфрақұрылымдық даму министрлігінің баспасөз қызметі хабарлады.  

Бүгінде өндіріс ошағы жоғары сапалы ферросилиций өндіретін үшінші пешті іске қосуда. Үшінші пештің қуаты 85,5 МВА құрайды, оны пайдалануға енгізумен ферроқорытпа зауытының жалпы өндірістік қуаты 30% – ға артып, жылына 180 мың тоннаны құрайды. Бүкіл әлемдегі жағдайға қарамастан, пешті іске қосу жоспарланған кестеге сәйкес жүргізілді. Компания COVID-19 пандемиясы кезінде жұмыс кестесін вахталық әдіске көшіріп, барлық қажетті жағдай жасағанының арқасында қазіргі өндіріс көлемін сақтап қалды.

Зауыттың өнімі-жоғары сапалы ферросилиций (FeSi75) электр техникалық, серіппелі, тоттануға қарсы және ыстыққа төзімді болаттарды балқыту кезінде қышқылдандыратын және қоспалайтын қоспа ретінде пайдаланылады. Шығарылатын өнім әр түрлі және кремнийдің пайыздық мөлшеріне байланысты 45% – дан 75% – ға дейін өзгереді. Ұнтақтау-сұрыптау кешенінің жұмысының арқасында өнім фракциялардың кең аралығында – 0-ден 315 мм-ге дейін шығарылады.

Зауытта газ тазалаудың жаңа, заманауи жүйесі енгізілген. Бұл кешен өндірістен шаңды ұстап, оны жанама өнім – микрокремнеземге айналдырады, содан кейін оны жоғары сапалы цемент пен бетон шығару үшін пайдалануға болады. Жобадағы отандық өнімнің үлесі 95 пайыздан асады.

Естеріңізге сала кетейік, «YDD Corporation» ЖШС зауытының ашылуы 2019 жылдың шілде айында өтті. Зауыт жаңа технологияларды қолдана отырып салынған, өндіріс процесі толығымен автоматтандырылған. Жоба ИИДМБ шеңберінде ҚДБ-ның қарыз қаржыландыруын тарта отырып, қазақстандық және еуропалық инвесторлардың жеке қаражаты есебінен іске асырылды.