Нұр-Сұлтанда бірқатар нысан жұмысын тоқтатады
Нұр-Сұлтандағы эпидемиологиялық жағдайға байланысты, карантин төртінші рет күшейтіледі. Қосымша карантин шектеулері туралы қаланың мемлекеттік санитарлық дәрігерінің жаңа қаулысы дайындалып жатыр. Карантин шараларын сақтау жөніндегі мониторингтік топтар күшейтілген режимде жұмыс істеуге көшкен. Әсіресе «Ashyq» жобасына енгізілген нысандардың жұмысының сапасын бақылау күшейтілді, деп хабарлайды елорда әкімдігінің баспасөз қызметі.
Енді жабық жағажайлар мен аквапарктер, оның ішінде бассейндер, қалалық жағажайлар, оның ішінде рұқсат етілмеген және ашық жердегі аквапарктер серуендеуге арналған су көліктері, (теплоходтар, катерлер, қайықтар, катамарандар, су мотоциклдері және т.б.), кинотеатрлардың жұмысына тыйым салынады.
Түнгі клубтарға «Ashyq» жобасы аясында жұмыс істеуге рұқсат етілмеген. Ал енді түнгі клубтардың жұмыс істеуіне толықтай тыйым салынады. «Ashyq»-сыз жұмыс істейтін жазғы тамақтану орындарының жұмысы демалыс күндері тоқтатылады.
Сондай-ақ, жексенбі күндері қоғамдық көліктің жұмысы тоқтатылады. Автобустарға дезинфекция жүргізіледі.
Бұдан бөлек, қоғамдық тамақтану нысандары үшін жұмыс уақыты («Ashyq» жобасынсыз жұмыс істейтін) орналасқан жеріне қарамастан мейрамхана, кафе және кофеханалар жұмыс күндері сағат 07:00-ден 20:00-ге дейін жұмыс істейді. Ал сенбі және жексенбі күндері жұмыс істеуіне тыйым салынады. Сондай-ақ ашық ауада (жазғы орындар) істейтін тамақтану орындары жұмыс күндері сағат 07:00-ден 22:00-ге дейін жұртшылықты қабылдаса, сенбі және жексенбі күндері жұмыс істеуіне тыйым салынады. Ал тамақты жеткізу, өзімен бірге алып кету штаттық режимде жүреді.
«Ashyq» жобасына қатысатын қоғамдық тамақтану нысандары үшін дүйсенбі-жұма күндері мекеме ішінде 07:00-ден 22:00-ге дейін жұмыс істеуіне рұқсат етілсе, сенбі мен жексенбі күндері ғимарат ішінде жұмыс істеуіне тыйым салынады. Ал ашық ауада аптаның барлық күнінде 07:00-ден 00:00-ге дейінгі режим белгілеу жоспарланып отыр.
Егер мейрамханаларда/кафелерде немесе өзге де мекемелерде мерекелік іс-шаралар, жиын-тойлар өткізілсе, нысанның жұмысы бірден тоқтатылады.
