Жол құрылысын жобалайтын мекемелерге жаза қатаңдайды
ҚР ИИДМ Автомобиль жолдары комитеті жол саласындағы жобалаушы ұйымдарға жазаны қатаңдатты. Алдағы уақытта аттестаттаушы сарапшылардың пікірлері басты назарға алынып, жауапсыз компаниялар өз ісіне салғырт қарайтын мекемелер санатына кіргізіледі. деп хабарлайды ҚР ИИДМ баспасөз қызметі.
Автомобиль жолдары комитетінің мәліметі бойынша елімізде соңғы жылдары автокөлік жолдарының құрылысы мен реконструкция жүргізу бойынша жобалар сапасына сын көп.
Атап айтқанда, ауданның климаттық ерекшеліктеріне бағдарланған техникалық шешімдер тиісті деңгейде назарға алынбайды, көпірлер мен өзге де нысан құрылысында пайдаланылатын материалдар мен оларды салу технологиясына жете мән берілмейді. Сонымен қатар жобалаушы компаниялар көп жағдайда жол құрылысы жұмыстарында арнайы киімдерді пайдаланбайды.
Жеке жобалаушы ұйымдар жол құрылысы мен реконструкциялау кезінде қауіпсіздік пен нысандардың беріктік қасиетін ұзақ уақыт қамтамасыз ететін инновациялық шешімдерді енгізуге құлықты емес. Көптеген жобалық шешімдердің сапасы сын көтермейді, тіпті «ҚазЖолҒЗИ» АҚ ұсынған жоғары нәтижелі ғылыми табыстарды өндіріс барысында есепке алмайды және қолданбайды. Жобалаушы компаниялар бұған дейін қолданылып келген типтік шешімдерге басымдық береді. Бұл шешімдер қосымша дәлелдемелерді қажет етпейді.
ҚР ИИДМ Автомобиль жолдары комитеті жол саласындағы жобалаушы ұйымдарға жазаны қатаңдатты. Алдағы уақытта аттестаттаушы сарапшылардың пікірлері басты назарға алынып, жауапсыз компаниялар өз ісіне салғырт қарайтын мекемелер санатына кіргізіледі.
Бұл шешім өз нәтижесін беріп те үлгерді. Мәселен, «Атырау – Орал» бағытындағы жобаны жүзеге асырушы мердігер ұйым жаңа жобалық шешімді пайдалануды қарастыруда. Бұл жоба жаңа айналма жолды салу кезінде бұрынғы жолдарды пайдалануды қарастырады және көлік қозғалысы кезіндегі жолақ енін 20 метрден 120 метрге дейін арттырады. Бұл шешімдер АҚШ-та кеңінен қолданылып, өзінің тиімділігін дәлелдеген.
