Президент олигархтық капитализмнің заманы өтті деп мәлімдеді

Мемлекет басшысы Қасым-Жомарт Тоқаев Қарағанды облысының жұртшылығымен кездесуі барысында елімізде олигархтық капитализмнің заманы өтті деп мәлімдеді.

Президенттің айтуынша, мемлекет елімізде жұмыс істейтін барлық ірі өндіруші компаниялардың қызметін өте жіті бақыланып, капиталды шетелге заңсыз шығаруға жол берілмейді.

 «Өндірісті жаңғырту үдерісіне, экологияны қорғау ісіне ерекше назар аударылады. Салық төлемақысы ерекше бақылауда. Егер ірі өнеркәсіп кәсіпорындары бұл талаптарға сай келмесе, біз серіктестікті тоқтатуға мәжбүр боламыз. Бұл – ешқандай қорқыту емес, керісінше бүкіл өркениетті әлемде қабылданған қарапайым, адал және әділ жұмыс ережелері.

Қазақстанда олигархтық капитализмнің заманы өтіп, ел азаматтарының алдындағы әлеуметтік жауапкершілікті сезінетін кезең жетті. Азаматтарымызға тиімді әрі әлеуметтік жауапкершілікті сезінетін, ел экономикасында жетекші орындағы бизнес керек»,- деді мемлекет басшысы.