«Қорғас» Қытай-Қазақстан шекаралық өткізу пунктінде өткізу қабілеттілігін арттыру мәселелері бойынша екі жақты кездесу өтті

Қытай тарапының шақыруымен Қазақстан Республикасы Қаржы министрлігі Мемлекеттік кірістер комитетінің (ҚР ҚМ МКК) төрағасы Данияр Жанәлінов Қытай Халық Республикасы Қытай тарапының «Қорғас» халықаралық шекаралық ынтымақтастық орталығында Бас кеден басқармасы басшысының орынбасары Чжао Цзэнлянмен кездесті. Бұл туралы Мемлекеттік кірістер комитеті хабарлады.

Әңгімелесу барысында тараптар Қазақстан-Қытай шекарасындағы өткізу пункттерінің жұмыс істеуінің өзекті мәселелерін және олардың өткізу қабілетін одан әрі арттыру шараларын талқылады.

Д.Жанәлінов қазақстандық тараптың Қытаймен кедендік ынтымақтастыққа ерекше мән беретінін хабарлап, шекарадағы өзекті мәселелерді шешу үшін тығыз ынтымақтастыққа дайын екенін жеткізді.

Сондай-ақ, Қазақстан Республикасы Қаржы министрлігі Мемлекеттік кірістер комитетінің басшысы Қазақстан Үкіметінің өткізу қабілеттілігін арттыру және сауда-экономикалық ынтымақтастықтың әлеуетін арттыру бойынша қабылдап жатқан шаралары туралы баяндады. Сондай-ақ ол осы айда «Нұр жолы» өткізу бекетіндегі өткізу қабілетінің айтарлықтай артқанына ерекше назар аударды.

Чжао Цзэнлян шекара әлеуетінің өсу динамикасын жоғары бағалап, Қытайдың өзекті мәселелерді шешуде тығыз ынтымақтастық пен көмек көрсетуге дайын екенін баса айтты.

Кездесу нәтижесінде тараптар өткізу қабілеттілігін одан әрі арттыру, тасымалдаушылар жүргізушілеріне виза беру мәселесін шешу, сондай-ақ «Нұр-Жолы» өткізу бекетінде бос тұрған тіркемелерді қайтару үдерісін жеделдету туралы келісімге келді.