АШМ gosagro.kz арқылы субсидияларды беру тәртібін уақытша жеңілдетеді
Ауыл шаруашылығы министрлігі субсидияларды беру тәртібіне уақытша жеңілдіктер енгізілетінін жария етті. Бұл туралы министрліктің баспасөз қызметінен хабарлады. Атап, айтқанда агрохимиялық картограммаларды қолдану талабы алынып тасталады. 2023 жылғы 24 сәуірде осы түзетулер күшіне енеді.
АШМ дерегінше, оған себеп Алматы, Жетісу, Жамбыл, Қызылорда және Түркістан облыстарының фермерлерінен арзандатылған тыңайтқыштарды алу мүмкіндігінің жоқтығы туралы көптеген өтініштер келіп түсіп жатыр. Олар мұның себебін фермерлерге gosagro.kz порталында өтініш беруге мүмкіндік бермейтін егістік картасы мен агрохимиялық картограмманың болуымен байланысты деп түсіндіреді.
Министрліктің хабарлауынша, бұған дейін судсидияларға өтінішті қабылданып келген бұрын Qoldau жүйесінде фермерлер егістіктерді өздері енгізген деректер негізінде цифрландырған болатын, әрі деректердің дұрыстығы тексерілмеді және қандай да бір форматты-логистикалық бақылау болмаған.
«Қазір gosagro.kz порталында субсидияларды алу үшін жердің ғарыштық мониторингінің деректері негізге алынады. Бұл ретте фермер ауыспалы егісті және оның егістіктерінің шекараларын анықтаған кезде параметрлерді қолмен енгізу, яғни көзбен белгілеу мүмкіндігі алынып тасталады. Сонымен қатар, деректер учаскелер бойынша сәйкес келмеген жағдайда, олар «Қазақстан Ғарыш Сапары «ҰК»АҚ-да түзетілуі мүмкін» делінген хабарламада.
Gosagro.kz порталында орналастырылған деректерге сәйкес, жоғарыда аталған бес облыстың фермерлері 23,5 млрд теңгеге тыңайтқыштарды сатып алуды субсидиялауға 837 өтінім берген. Оның ішінде 350 өтінімді тиісті өңірлердің Ауыл шаруашылығы басқармалары қабылдамады, 47 өтінім мақұлданды.
«Әкімдіктердің ақпараты бойынша мемлекеттік қолдаудан бас тартудың негізгі себебі өсімдік шаруашылығы өнімінің өнімділігі мен сапасын арттыру бойынша бекітілген субсидиялау қағидаларына сәйкес 2023 жылғы 1 қаңтарда күшіне енген агрохимиялық картограммалардың болмауы. 2023 жылдың 1 қаңтарына дейін агрохимиялық картограммалар бойынша талаптар болған жоқ» делінген ақпаратта.
Сонымен қатар, аталған мәселені шешу үшін АШМ жоғарыда аталған ережелерге түзетулер енгізді. Осылайша, агрохимиялық картограммаларды қолдану талабы алынып тасталады. 2023 жылғы 24 сәуірде осы түзетулер күшіне енеді.
Сондай-ақ, министрлік мәліметінше, 2023 жылдың 31 желтоқсанына дейін «Қазақстан Ғарыш Сапары «ҰК» АҚ арқылы өрістерді цифрландыру бойынша кейінге қалдыру енгізіліп жатыр. Алайда, белгіленген мерзімге дейін фермерлер осы егістіктерді құқық белгілейтін құжаттарға сәйкес міндетті түрде түзетуі керек. Тиісті кестені АШМ «Қазақстан Ғарыш Сапары «ҰК»АҚ-мен бірлесіп бекітетін болады.
