Банкроттық бойынша өтініш берген алматылықтардың 70%-ына бас тартылды

Бүгінде банкроттық бойынша барлық түскен өтініштердің 83 пайызы қаралған. Бұл туралы Өңірлік коммуникациялар қызметі алаңында Алматы қаласы бойынша Мемлекеттік кірістер департаментінің өкілдері баяндады.

«Қазақстан Республикасы азаматтарының төлем қабілеттілігін және банкроттығын қалпына келтіру туралы» Заңды іске асыру аясында 3 наурыздан бастап банкроттық туралы азаматтардың өтініштерін қабылдау басталды. Ағымдағы жылдың 24 сәуіріндегі жағдай бойынша 3 662 өтініш түсті», – деді Мемлекеттік кірістер департаменті қарыздармен жұмыс басқармасының басшысы Айдос Будугулов.

Өтініш берушілердің 362-і АӘК алушылар. Бес жыл бойы берешегі бар 690 азамат жүгінген.

Мемлекеттік кірістер департаменті мәліметінше, бүгінде 3662 өтініштің 3055-і қаралған. Оның ішінде 503 азаматқа қатысты соттан тыс банкроттық рәсімі қозғалған, бұл түскен өтініштердің 14% пайызын құрайды.

2 552 азаматтың соттан тыс банкроттық бойынша өтініші мақұлданбады. Өйткені, кейбір несиелік келісімдердің орындалмауынан – кешіктіру мерзімі 12 айдан аспай, сонымен қатар мүліктің бар екені анықталады. Мұндай өтініштердің саны 70 пайызды құрайды.

«Соттан тыс тәртіпте банкроттық туралы өтініш бергенде белгілі бір талаптар қойылады. Азаматтар бұл тәртіпті 1600 АЕК-тен жоғары (2023 жылы – 5 млн 520 мың теңге) және кредиторлар алдындағы берешектердің барлық түрлері бойынша қолдана алады», – деп нақтылады брифинг спикері.

605 өтінішке қатысты (бұл барлық түскен өтініштердің 16%-ы) тексеру жүргізілуде.
Сот банкроттығына қатысты бүгінге дейін 58 өтініш түскен. Олардың ішінен:

• 6 азаматқа банкроттық туралы азаматтық іс қозғау туралы сот ұйғарымы шығарылып, қаржы менеджерлері тағайындалған.
• 32 азамат бойынша сот арызды қайтарды, арызды қабылдамаудың негізгі себебі талап-арыздың талапқа сәйкес келмеуі болып табылады.

Сондай-ақ, банкрот деп танылған азаматтарға 5 жыл бойы несие берілмейтіні ескертіледі.

Өзін банкрот деп жариялағысы келетін жеке тұлғалардың әрбір өтініші 15 жұмыс күні ішінде қаралатынын баса айтты. Банкроттық рәсімінің өзі 6 айға созылады, оның мерзімі өткеннен кейін банкрот деп танылған азаматтардың тізімі уәкілетті органның ресми сайтында жарияланады.

Соттан тыс банкроттық туралы өтініш беру үшін азаматтар «e-Salyq Azamat» қосымшасы арқылы, сондай-ақ азаматтарға арналған Үкімет порталына жүгіне алады. Сонымен қатар, ХҚО арқылы қағаз жүзінде өтініш беруге болады.
Ал сот арқылы банкроттық рәсімдеу үшін тұрғылықты жері бойынша сотқа жүгіну қажет.