Фото: shutterstock.com
2 мамырдан бастап сот орындаушылары автокөлік құралдарына тиым салу немесе оны алып тастау процедурасын бірнеше минут ішінде электронды тәсілмен жүзеге асыра алады. Бұл туралы ҚР Әділет министрлігінің ресми өкілі Талғат Уәли хабарлады.
Талғат Уәлидің айтуынша, осы жобаны енгізудің арқасында сот орындаушылары мен ішкі істер органдары арасындағы қағаз құжат айналымы қысқартылды. Автокөлік құралдарына салынған тыйымды алу онлайн төлемнен кейін автоматты түрде жүргізіледі. Сондай-ақ сот орындаушыларының қаулыларын өңдеуде адами фактор жойылды.
Бұдан басқа, онлайн төлем жасағаннан кейін ішкі істер органдарына автокөлік құралдарынан шектеуді алып тастау үшін қаулыны жіберу бойынша сот орындаушыларына жүгіну қажеттігі жоқ, өйткені барлық қажетті іс-әрекеттер автоматты түрде электрондық форматта жүргізілетін болады, деп атап өтті ресми өкіл.
Бұл Әділет министрлігінің Digital Justice жобалар портфелі шеңберінде іске асырылуда. Жобаны Әділет министрлігі, Республикалық жеке сот орындаушылар палатасы, Ішкі істер министрлігі, Бас прокуратураның Құқықтық статистика және арнайы есепке алу комитеті бірлесіп әзірледі.
