Алматыда BAIQONYR халықаралық кинофестивалі өтеді
Фото: shutterstock.com
2023 жылдың 6-10 қыркүйек аралығында Алматыда BAIQONYR халықаралық кинофестивалі өтеді. Фестиваль биыл сегізінші рет ұйымдастырылып отыр.
Фестивальдің конкурстық бағдарламасына қатысу үшін өтінімдерді қабылдау 5 мамырда басталады. Халықаралық конкурстарға өтінімдер 1 шілдеге дейін, Ұлттық конкурстарға 1 тамызға дейін қабылданады.
Биыл кинофестивальге қысқаметражды ғана емес, сонымен қатар дебюттік толықметражды фильмдер да қатысады.
«Кинофестивальдің миссиясы – кинематографтың дамуына жәрдемдесу, талантты авторларды қолдау және қазақстандық мәдениетті әлемдік кино қоғамдастығына ықпалдастыру», делінген хабарламада.
Baiqonyr-2023 байқау бағдарламасының толық тізімі келесідей:
- Халықаралық дебюттік толықметражды көркем фильмдердің байқауы;
- Халықаралық көркем және деректі қысқаметражды фильмдер байқауы;
- Ұлттық көркем және деректі қысқаметражды фильмдер байқауы.
Конкурстан тыс бағдарламада ТМД елдерінің кинотанушылары мен сыншыларының II форумы өтеді, оның жұмысына 30-дан астам шетелдік мамандар қатысады.
Бұған дейін қазақстандық «Бесік жыры» анимациялық фильмі Испания кинофестивалінде үздік атанғанын жазған едік.
