Дәрігерлер «АрселорМиттал Теміртау» АҚ қазақстандық шахтасында болған өрт салдарынан ауруханаға жатқызылған кеншілерге «көмірқышқыл газынан улану» диагнозын қойды, деп жазады Интерфакс Қарағанды облысының денсаулық сақтау басқармасына сілтеме жасап.
«Қазір зардап шеккен екі кенші Шахтинск қаласының орталық ауруханасында жатыр. Алдын ала диагноз бойынша «жеңіл дәрежедегі көмірқышқыл газынан уланған». Оларға медициналық көмек көрсетілуде», – делінген бейсенбі күні таратқан хабарламада.
Ал тағы екі кеншінің жағдайы ауыр.
«Екі кенші Мақажанов атындағы емханада жатыр. Алдын ала диагноз бойынша «көмірқышқыл газынан қатты уланған». Дәрігерлер барлық қажетті көмекті көрсетіп жатыр», – деп хабарлайды облыстық денсаулық басқармасы.
Бейсенбі күні сағат 10:05-те Қарағанды облысында «АрселорМиттал Теміртау» АҚ көмір департаментіне қарасты «Казахстанская» шахтасында конвейер лентасы өртенді. «АрселорМиттал Теміртау» АҚ баспасөз қызметі жүзден аса адам қауіпті аймақта қалып қойғанын хабарлады.
Кейін Қарағанды облыстық әкімдігі өрт шыққан «Казахстанская» шахтасынан жер бетіне шығарылған адам саны екі жүзге жуықтағанын хабарлады. Жұмысшыларды эвакуациялау қапталдағы оқпан арқылы жүргізілген.
Қарағанды облыстық әкімдігінің хабарлауынша шахтадан барлығы 222 қызметкер жер бетіне шығарылған. Қалған бес адамды іздестіру жұмыстары жалғасуда.
