Израиль Дамаск пен Алеппо әуежайларына шабуыл жасады

Израиль Сириядағы Дамаск пен Алеппо халықаралық әуежайларына зымыран соққыларын жасады. Израильдің шабуылынан Дамаск әуежайының қызметкері қаза тауып, тағы біреуі жарақат алды. Бұл туралы Сирияның Араб ақпарат агенттігі SANA әскери дереккөзге сілтеме жасап хабарлады.

«Сағат 05:25 шамасында Дамаск пен Алеппо халықаралық әуежайларына соққылар жасалды», – деп хабарлады SANA.

Ливанның Al Mayadeen телеарнасы Алеппо әуежайына кем дегенде төрт зымыран атылғанын хабарлады. Бірақ кейбіреулерін жергілікті әуе қорғанысы жүйесі атып түсірді.

Ұшу-қону жолағының зақымдануына байланысты екі әуежай да жұмысын тоқтатты. Сирияның Көлік министрлігі РИА Новости-ға ішкі және халықаралық рейстер Алеппо мен Дамаскіден Латакия халықаралық әуежайына бағытталғанын хабарлады.

Израиль бұған дейін 12 қазанда Алеппо мен Дамаск әуежайларына шабуыл жасады. Sana әскери дереккөзінің хабарлауынша, Израиль армиясы ұшу-қону жолақтарын зақымдаған бірнеше зымырандарды атып, әуежайлардың жұмысын тоқтатты.

Бес күннен кейін, 17 қазанда, зымыран соққысы Газадағы «Әл-Ахли Әл-Маадани» ауруханасына тиді. Палестина билігінің мәліметінше, жарылыс салдарынан 470-ке жуық адам қаза тауып, 300 адам жарақат алған.

Израиль әскерилері зымыранды «Исламдық жиһад» (Газа секторында орналасқан исламшыл жауынгерлік топ) содырлары ұшырды деп мәлімдейді. ХАМАС аурухананың әуе шабуылына кінәні Израиль қорғаныс армиясына (IDF) жүктейді.