Ақтөбе облысында жалған құжат жасап, бөгде тұлғаларға шаруа қожалығын тіркеп, «Сыбаға» бағдарламасы арқылы 970 млн теңге несие алғандар анықталды. «Аграрлық несие корпорациясы» АҚ-дан бөлінген қаражатқа асыл тұқымды ірі қара мал сатып алынуға тиіс еді. Алайда оны қолма-қол ақшаға айналдырған.
Қаржы мониторингі агенттігі тергеу барысында жалған құжат пайдаланып, асыл тұқымды ірі қара сатып алуға бөлінген несие қаражатын қолма-қол ақшаға айналдырып, сондай-ақ бөгде тұлғаларға шаруа қожалықтарын ресімдеген 3 тұлға анықталғанын хабарлады.
Олар мемлекетке жалпы сомасы 970 млн теңгеден аса ірі мөлшерде залал келтірген.
«Қазіргі уақытта 3 күдікті ұсталды, оларға қатысты сот «қамауда ұстау» түріндегі бұлтартпау шарасын қолданды. Күдіктілердің шамамен 260 млн теңгеге жылжымалы және жылжымайтын мүлкіне тыйым салынды. ҚР ҚПК-ның 201-бабының тәртібімен тергеу мүддесінде өзге де ақпарат жариялауға жатпайды», – делінген ҚМА хабарламасында.
Бұған дейін ҚМА Әлеуметтік медициналық сақтандыру қорының 2,1 млрд теңгесі жымқырылғанын анықтады.
Сонымен қатар 700 млн теңге жымқырған Шымкент қаласы әкімдігінің лауазымды тұлғасы ұсталды.
