Фото: kursiv.media
Маңғыстау облысының әкімі Нұрлан Ноғаев «ҚазМұнайГаз» компаниясы 2023 жылдың соңына дейін өңірде өндіруді жоспарлаған мұнай-газ көлеміне қол жеткізе алмауы мүмкін екенін мәлімдеді.
«ҚазМұнайГаздың» жоспары, қателеспесем, мұнай бойынша 17 млн, газ бойынша 2 млрд 600 млн текше метрді құрайды. «ҚазМұнайГаз» жоспарланған мұнай-газ көлемін өндіре алмауы мүмкін. Бұл көлемге жете алмайтыны анық. Бұған электр қуатының үзілуі және басқа да техникалық жағдайлар себеп болды», – деді өңір басшысы Орталық коммуникациялар қызметіндегі брифингте.
Биыл елімізде мұнай өндіру көлемі шамамен 10%-ға қысқарды. Бұған Маңғыстау атом энергетикалық комбинатындағы (МАЭК) апат тікелей әсер етті. Электр қуатының шектелуіне байланысты Қазақстанда мұнай өндіру көлемі жалпы алғанда 10%-ға, ал тәулігіне 1,5-2 млн тоннаға қысқарды.
Осыған байланысты тамыз айында Энергетика министрі Алмасадам Сәтқалиев алдын ала болжанған өндіріс көлемі өзгеруі мүмкін екенін жариялады.
«Мүмкін, біз жыл соңына дейін мұнай өндіру болжамын төмендететін шығармыз. Қазіргі уақытта біз өндіру көлемі шамамен 89,4 млн тонна мұнайды құрайды деп жоспарлап отырмыз. Динамиканы көрейік, өйткені кен орындарында жөндеу жұмысы жүріп жатыр», – деген болатын Алмасадам Сәтқалиев.
Министр мұнай өндірудің бұрын болжанған көлемі 90,5 млн тонна деңгейінде болғанын еске салды. Алмасадам Сәтқалиев МАЭК-тегі апат мұнай өндіру көлемінің төмендеуіне әкеліп соғатын жалғыз фактор емес екенін атап өтті.
«Жалпы, кен орындарында жоспарлы және жоспардан тыс жөндеу жұмыстары болды. Бұған қоса жөндеудің қосымша көлеміне қатысты мәселелер туындады. Электр қуатына шектеу қойылғандықтан, тәулігіне 12 мың тонна ауытқу тіркеліп жатыр», – деп түсіндірді Энергетика министрі.
Энергетика министрлігі Мұнай және газ ақпараттық-талдау орталығының мәліметінше, отын-энергетика кешеніндегі апаттан кейінгі 4 күнде Қазақстанда мұнай өндіру көлемі бірден 10%-ға төмендеген.
10 тамызда тәуліктік мұнай және газ конденсатын өндіру 232 мың тоннаны құраса, 14 тамызда 209,3 мың тонна болған.
11 тамызда МАЭК-2 ЖЭО-да 2 турбоагрегат сөндірілді. Салдарынан Атырау энергетика орталығында 45 МВт, Маңғыстау энергетика орталығында 98 МВт тоқ тұтынушыға жетпей қалды. Бірқатар елдімекендерде электр жарығын беру жартылай шектелді. Оқиғаға орай құрылған жедел штаб желдеткіш арқылы электр энергиясын беруге уақытша шектеу енгізу туралы шешім қабылдады.
Сарапшылардың есебінше, МАЭК-те болған апатты жағдайдың салдарынан бюджетке түсуге тиіс болған салықты қоса алғанда 1 млрд доллардан астам шығын келді.
Мұнай және газ нарығының сарапшысы Олжас Байділдинов мәселені шешу үшін МАЭК-ті «ҚазМұнайГаз» ҰК АҚ-ға беруді ұсынды. Ол проблемалық активті «Самұрық-Қазына» ұлттық әл-ауқат қорына беру әлдеқайда тиімдірек болатынына да назар аударды. Оның айтуынша, бұл энергетикалық кәсіпорын жұмысына тұрақтылық пен сенімділік береді, сонымен қатар ішкі мәселелерді шешуге жағдай жасайды
