Алтын бағасының көтерілуінен болған әсер 750 млн доллардан астам мемлекеттік борышты төлеумен теңестірілді. Бұл туралы Ұлттық банк төрағасының орынбасары Әлия Молдабекованың «Теңге бағамының динамикасы және қаржы нарықтарындағы соңғы үдерістер» баяндамасында жазылған.
Қараша айының қорытындысы бойынша, алдын ала мәліметтерге сәйкес, Қазақстанның алтын валюта резерві 34,1 млрд долларды құрап, бір айда 131 млн долларға ұлғайған. Қараша айында алтын бағасы бір унция үшін 1998 доллардан 2038 долларға дейін өскен. Бұған әлемдегі геосаяси жағдайдың күрт нашарлауы, атап айтқанда, Таяу Шығыстағы қақтығыстар әсер еткен.
«Ұлттық қордағы валюталық активтердің көлемі өткен айда шамамен 2,3 млрд долларға ұлғайып, қараша айының соңында 58,6 млрд доллар болған. Жылдың алғашқы 11 айында Ұлттық қорда 4,4 млрд доллар мөлшерінде оң инвестициялық табыс қалыптасты»,– делінген баяндамада.
Акциялар, облигациялар, сондай-ақ алтын нарықтарындағы ралли Ұлттық қордың қараша айындағы инвестициялық кірісіне оң әсер еткен. Ол осы жылдың басынан бері бір айда шамамен 2,5 млрд долларды құраған.
«Қараша айында Ұлттық қордан республикалық бюджетке бөлінген трансферттер 237,3 млрд теңге болды. Бұдан басқа, Ұлттық қорға республикалық бюджетті қаржыландыру үшін «Қазмұнайгаз» ұлттық компаниясының 550 млрд теңге сомасындағы акциялары сатып алынды. Аталған операцияларды іске асыру мақсатында ішкі валюта нарығында 1,3 млрд АҚШ долларына шетел валютасы біркелкі сатылды», – делінген баяндамада.
Қараша айында Ұлттық қордағы валюталық активтер шамамен 1,1 млрд долларға өскен. Бұған мұнай-газ секторы компанияларының салық төлемдері әсер еткен.
Осыған дейін баяндамадағы ақпаратқа сәйкес, 2023-2024 жылдары БЖЗҚ зейнетақы активтері бойынша еркін өтімділіктің бір бөлігін «Бәйтерек» ҰБХ» АҚ мен «Самұрық-Қазына» ҰӘҚ» АҚ квазимемлекеттік компанияларының облигацияларына инвестициялау жоспарланып отырғанын жазған едік.
