«Air Astana» әуе компаниясы бес A320 (CEO) ұшағын сатып алады. Бұл өз кезегінде қозғалтқышқа қатысты өзгерген ұшу кестесіне оң әсер етпек. Бұл жайлы компанияның баспасөз қызметі хабарлады.
Компания мәселені шешу үшін ұшақтарға арнайы қозғалтқыш сатып ала бастаған. Баспасөз қызметінің мәліметінше қажет болған жағдайда оларды жалға алу мәселесі қарастырылады.
«Air Astana» әуе компаниясы PW1100 қозғалтқыштарындағы техникалық ақаулардың әсерін жою және азайту үшін ертерек шаралар қабылдады. Өткен жылдың күзінде «Эйр Астана» флотындағы бір P&W қозғалтқышы сынақтан өтіп, әуе компаниясы оны дереу ауыстырды. Бүгінгі таңда бес қозғалтқыш қосалқы ретінде жеткізілді, алтыншысы келеді деп күтілуде, қосымша қозғалтқыштарды жалға алу бойынша келіссөздер жүргізілуде»,- делінген хабарламада.
Компанияның хабарлауынша, P&W қозғалтқыштарына қатысты қиындықтар A320NEO отбасылық флотына әсер еткен. Осыған байланысты компания бұл ұшақ түрлерін көбейтуді жөн санаған.
«Эйр Астана» тобы бұрын жоспарланған осы үлгідегі ұшақтарды жеткізуге қосымша, өткен жылы екі A320 (CEO) ұшағын сатып алды және жақын арада қосымша бес бірдей ұшақ түрін сатып алуды жоспарлап отыр. Бұл шаралар ұшу қауіпсіздігінің жоғары деңгейін сақтай отырып, «Эйр Астана» тобының кестелеріне әсер етуді азайтуға көмектеседі»,- деп хабарлады компания.
Еске сала кетсек, Air Astana әуекомпаниясында рейстер саны қысқаратыны жайлы Halyk Finance компаниясының аналитикалық есебінде айтылды. Онда компанияның Pratt&Whitney қозғалтқыштарындағы ақауларға байланысты 17 ұшақты рейстерден алып тастауы мүмкін екені айтылды.
«Air Astana-ның 17 ұшағында (компанияның авиапаркінде 49 ұшақ) Pratt&Whitney қозғалтқыштары орнатылған. Олар 2024 жылы техникалық тексеруге жіберілуге тиіс. Бұл компанияның рейстерінің қысқаруына әкелуі мүмкін»,– делінген Halyk Finance есебінде.
2023 жылдың шілде айында Pratt & Whitney кейбір қозғалтқыш бөлшектерін жасау үшін қолданылатын металл ұнтағының сирек жағдайы туралы хабарлады. Бұл жоғары қысымды турбинаның бірінші және екінші сатыдағы дискілерді жарып, оларды істен шығаруы мүмкін.
Бұл мәселе GTF PW1100G-JM және pw1400g-JM қозғалтқыштарына қатысты. Ол бүкіл әлем бойынша көптеген авиакомпанияларға әсер етті. Бұл қозғалтқыштар A320 және A321 ұшақтарында орналастырылған.
«Нәтижесінде авиакомпаниялар осы қозғалтқыштары бар барлық ұшақтарды тексеруге жіберуге мәжбүр», – дейді сарапшылар.
Айта кетейік, Қаржы нарығының сарапшылары Air Astana қанша тұратынын есептеп көрген. Freedom өкілдері компанияның IPO-ға дейінгі құны 453-575 млрд теңге ($1-1,26 млрд) деп тұжырымдайды. Ал IPO-дан кейінгі бағасы 481-625 млрд теңге немесе 1,06-1,37 млрд долларға жетуі мүмкін.
Айта кетейік, Air Astana компаниясының 2023 жылғы 9 айдағы кірісі күрт өскен. Былтыр қаңтар-қыркүйек айларындағы жалпы түсімі мен өзге де кірісі $900,6 млн құраған. Бұл бір жыл бұрынғы көрсеткішпен салыстырғанда 20,5%-ға артық. 2022 жылдың 9 айындағы кірісі $747,2 млн болған.
Сонымен қатар Air Astana әуе компаниясының басшысы Питер Фостер FlyArystan компаниясы тәуелсіз компанияға айналмайды деп мәлімдеді.
