Өткен аптаны жақсы көрсеткішпен жапқан АҚШ қор нарықтары дүйсенбі күні біршама төмендеді. Оған еңбек нарығының күшті деректері мен ФРЖ-ның ақша-несие саясатындағы сақтық ұстанымы әсер етті. АҚШ қор нарығындағы Dow Jones индексі 0,71%-ға, S&P 500 индексі 0,32%-ға және Nasdaq Composite – 0,2%-ға төмендеді.
S&P индесіндегі 11 сектордың тоғызы (технология мен денсаулық сақтауды қоспағанда), қызыл түспен жабылды. McDonald’s акциялары өткен тоқсандағы әрқилы көрсеткішінің аясында 3,7%-ға төмендеді. Tesla акциялары өсіп келе жатқан бәсекелестік пен тұрақты баға қысымы жағдайында 3,6% төмендеді.
Еуропа қор нарықтары сауданы теріс нотамен бастады: Stoxx 600 бен DAX 40 индекстері дүйсенбіде 0,1%-ға төмендеді. Сауда деректері Германия экспорты мен импорт күткеннен де қатты құлдырағанын байқатты. Ifo деректеріне сәйкес, немістің өндіруші компанияларының 36,9%-ы тапсырыс жоқ екенін хабарлаған.
MorphoSys акциялары Novartis компаниясын сатып алу туралы келіссөздер жүргізіп жатқаны туралы ақпараттан кейін 37% қымбаттады. Unicredit акциялары дивидендке қатысты жоспарын жариялаған соң 8%-ға өскен. Lotus Bakeries акциялары күшті кірісінің арқасында 18% -ға жуық өссе, Nordea төмен нәтиже салдарынан 5% төмендеді.
Nikkei 225 индексі сейсенбіде 0,6%-ға төмендеп, 36 129-дан төмен болды. Жапонияның үй шаруашылығы шығыстары желтоқсанда күтілгеннен көп төмендеді. Инфляцияға байланысты түзетілген нақты жалақы да төмендеуін жалғастырды.
Қытайдың Shanghai Composite индексі сейсенбіде 0,8%-ға өсіп, 2724-ке жетті. Жоғары технологиялық, денсаулық сақтау және энергетика саласы көш бастады: Aier Eye Hospital (+7,5%), Longi Green Energy (+4,8%) және Foxconn Industrial (+3,2%).
Дүйсенбі күні KASE индексінің мәні 0,02%-ға төмендеп, 4 321,93 тармақты құрады. Өкілдік тізімдегі акциялар арасында мәмілелердің басым бөлігі «Қазақстан Халық Банкі» АҚ акцияларымен жасалды – 1 787. Көлемі жағынан «ҚазМұнайГаз» Ұлттық компаниясы» АҚ акциялары басым түсті – 468,4 миллион теңге. «ҚазМұнайГаз» Ұлттық компаниясы (+1,23%), «Қазақстан Халық Банкі» АҚ (+0,85%), «ҚазТрансОйл» АҚ (+0,60%) және «Кселл» АҚ (+0,40%) акциялары өсім көрсетті.
