Ulmus Besshoky компаниясы 8 млрд теңгені қайдан алды?

Қарағанды облысындағы Бесшоқы мыс кен орнын барлаумен айналысып жатқан Ulmus Besshoky компаниясы 8 миллиард теңге несиелік келісім жасасқанын хабарлады.

Несиені кім бергені көрсетілмейді. Ол Ulmus Besshoky барлау жобасының айналым қаражатын толтыру үшін кепілсіз берген.

Несие сомасы несие алу туралы шешім қабылданған күнгі компания активтерінің жалпы баланстық құнының 176,98%-ына тең. Негізгі қарызды және несие бойынша есептелген сыйақыны толық өтеуге 4 жыл уақыт берілген. Компания несие берушінің қаражатын 2028 жылдың 7 қарашасында қайтаруы тиіс.

Қазақстан қор биржасының мәліметі бойынша 2024 жылғы 1 қаңтардағы жағдай бойынша компанияда 3 акционер бар. Олар – BAI TAU MINERALS компаниясы – 36,67% акцияға иелік етеді. Тимур Исаев – 33,92% акцияға ие. Бхамре Прасад (есепте азаматтығы көрсетілмеген, Қазақстанда тұру ыхтиярхаты бары) – 29,41% акцияға иелік етеді. 2022 жылдың соңында Тимур Исаев компанияның 52% акциясына, Бхамра Прасад 45% акциясына иелік еткен.

«Қазгеология» ұлттық компаниясы Қарағанды облысындағы Бесшоқы ауданында түсті және бағалы металдарды барлауға арналған келісімшартты Инвестициялар және даму министрлігімен 2015 жылдың наурыз айында жасасқан. 2015 жылдың шілде айында Ulmus Besshoky ведомствомен осы келісімшарттағы қосымшаға қол қойған. Содан кейін геологиялық барлау келісімшарты бойынша құқықтар мен міндеттердің 75 пайызы осы компанияға өткен. Ал 25 пайызы «Қазгеологияда» қалған. Келісімшартқа сәйкес Ulmus Besshoky жобаға 1,9 миллиард теңгеден аспайтын инвестиция салуға міндеттенді. 2022 жылдың сәуірінде келісімшарт бойынша барлау мерзімі үш жылға ұзартылған.

2023 жылдың қаңтар-қыркүйек айларында компания 53,8 миллион теңге шығынға ұшыраған. Өткен жылдың 30 қыркүйегіндегі жағдай бойынша компанияның қысқа мерзімді міндеттемелері ағымдағы активтерінен 1,96 миллиард теңгеге асып түскен. Ulmus Besshoky жұмысын жалғастыру үшін үлескерлерден қосымша қаржы алуды жоспарлаған. Компания мыс пен молибденді өндірудің технологиялық процесін одан әрі құру және оңтайландыру мақсатында технологиялық зерттеулер жүргізуді көздеген.

2022 жылы Ulmus Besshoky 165,7 миллион теңге, 2021 жылы 36,7 миллион теңге шығын алған. 2022 жылы компания акционерлер мен инвестициялық компаниялардан жалпы сомасы 246,2 млн теңгеге, 2021 жылы 135,9 млн теңгеге несие тартқан.