![](https://kz.kursiv.media/wp-content/uploads/2024/03/4_shutterstock_1261612804-1024x683-1.webp)
Жасанды технологиямен байланысты компаниялар былтыр басқа индустриялармен салыстырғанда көп пайда тапқан. Ал олардың акцияларының баға белгілеуі үш мәнді өсім көрсетіп отыр.
Жасанды интеллект нарығы
Сарапшылар жасанды интеллект нарығының көлемін әртүрлі бағалауда. MarketsandMarkets-тің ең қарапайым есептеуі бойынша, 2023 жылы жаһандық AI нарығының көлемі 150,2 млрд долларды құрады. Next Move Strategy Consulting жасанды интеллектің әлемдік нарығын 200 млрд доллардан астам деп бағалайды. Ең оптимистік деректер үндінің Fortune Business Insights консалтингтік компаниясында. Оның болжамдары бойынша, AI нарығы 2023 жылғы 515,31 млрд доллардан 2030 жылға қарай 2 трлн долларға дейін өседі. Бұл ретте, сарапшылардың болжамы бойынша, орташа жылдық өсу қарқыны 21,6-дан 36,8%-ға дейін болады. Goldman Sachs мәліметтері бойынша, алдағы 10 жылда AI технологияларын қолданудан келетін экономикалық тиімділік дүние жүзінде 7 трлн долларға жетуі мүмкін.
Осы орайда жасанды интеллектіге негізделген компаниялардың акцияларына инвестиция салу тиімді ме деген сауал туындайды? Бұл туралы «Курсив» сарапшылар пікірін білді.
Сарапшылар пікірі
«Евразия Капитал» АҚ сарапшысы Әли Сағындықов жасанды интеллект төңірегіндегі даурықпа толығымен ақталды деп есептейді.
«AI негізіндегі өнімдер Google, Microsoft, Nvidia сияқты ірі инвесторлардан, венчурлық қорлардан да, қарапайым тұтынушылардан да нақты сұранысқа ие. AI технологиялары өте жылдам дамып, оның қолдану аясы барған сайын кеңейіп келеді. Бұл одан әрі ілгерілеу үшін үлкен мүмкіндіктер ашады. Жасанды интеллектімен байланысты көптеген компаниялның одан әрі өсетіні сөзсіз. Бұл ретте, әрине, бәсекелестік деңгейі артып, қызметтің басқа салаларындағы сияқты кейбір компаниялар сәтсіздікке ұшырайды», – дейді ол.
«NASDAQ индексінің ағымдағы деңгейлері іргелі көрсеткіштер тұрғысынан негізделген»,– дейді UD Capital активтерді басқару департаментінің директоры Дамир Сейсебаев. Индекс 26,5 баға/форвардтық кіріс қатынасы бойынша баға/пайдамен саудаланады. 12 айдағы коэффициент 33. Сонымен қатар соңғы 12 айда индекске енген компаниялардың пайдасы 14%-ды құрады. Ұзақ мерзімді перспективада AI-ға салынған инвестиция толығымен ақталған, деп санайды сарапшы. Дегенмен ол циклдардың осы компаниялардың өсуіне әсерін жоққа шығармайды. Сондықтан бір жылдан екі жылға дейінгі аралықта түзетуге мүмкіндік береді.
Freedom Finance жаһандық сарапшысы Тамерлан Абсалямов AI индустриясының болашағы зор екенін болжайды. Жаһандық нарық жасанды интеллектіге негізделген қосымшалар санының күрт өсуінен, тиісті серіктестіктер мен ынтымақтастықтардың кеңеюінен, шағын AI жеткізушілерінің саны, бизнес құрылымдарының күрделілігінің өзгеруі және қызметтерді жекелендіру талаптарының артуынан қарқынды өседі.
Мемлекеттік бастамалар мен жасанды интеллект технологияларына инвестиция салу сала үшін артықшылықтар туғызуда. Алдағы онжылдықта 1 триллион доллар көлемінде жұмсалатын қосымша шығындар бағдарламалық қамтамасыз ету экожүйесіне және технология секторының қалған бөлігіне үлкен әсер етеді. Сондықтан сарапшы мұндай тұрақты өсу қарқынын ескере отырып, AI дамуының негізгі бенефициарлары болып табылатын кейбір компаниялардың бағалауының жоғарылауына таң қалудың қажеті жоқ екенін айтады.
«Қысқа мерзімді перспективада AI кеңістігі шамадан тыс сатып алынған болып көрінгенімен, саланың ұзақ мерзімді өсуі мінсіз. Жасанды интеллектімен байланысты көптеген компания болашақта күшті негіздерді және айтарлықтай өсу әлеуетін көрсетеді. Бұл оларды инвестиция үшін тартымды етеді»,– деп қорытындылады Freedom Finance Global сарапшысы.
Freedom Finance Global компаниясының AI инвестицияларына арналған акциялар тізімі
«Курсив» өтініші бойынша Freedom Finance Global өзінің перспективті AI акцияларының тізімін ұсынды.
Nvidia (NVDA)
2023 жылы қор нарығының үлкен сенсациясы және жасанды интеллект төңірегіндегі серпіліс бенефициары болды. Соңғы 12 айда компанияның акциялары 3 есе қымбаттады. Компания жасанды интеллект қосымшаларын іске қосу үшін қажетті орасан зор есептеу қуатын қамтамасыз ететін жоғары технологиялық чиптердің ірі өндірушісі. Жақында Nvidia Alphabet-ті басып озып, АҚШ-тың ең құнды үш компаниясының бірі болды. Қазір АҚШ-та капиталдандыру бойынша Nvidia Microsoft пен Apple-ден кейін екінші орында тұр.
Meta Platforms (META)
Әлеуметтік медиа мен онлайн-жарнама нарығының көшбасшысы, Facebook, Instagram және басқа платформалардың иесі. Meta ең озық OpenAI үлгісімен салыстырылатын максималды қуатқа қол жеткізуге арналған жаңа жасанды интеллект жүйесін әзірлеуде. Компания өз платформаларында 20-дан астам генеративті AI мүмкіндіктерін сынақтан өткізіп жатыр. Инвестициялық банктердің максималды мақсатты бағасы 575 долларды құрайды (шамамен 22% жоғары). META акциялары бір жылда 186%-ға өсті.
Amazon (AMZN)
Бизнесінің барлық аспектісіне жасанды интеллекті енгізді. Компания бұлттағы клиенттеріне кеңейтілген мәтінді талдау, автоматтандырылған код шолулары және чат-боттарды қоса алғанда, жасанды интеллект пен машинаны оқыту қызметтерінің кең ауқымын ұсынады. Инвестициялық банктердің орташа мақсатты бағасы 208 долларды құрайды (шамамен 23% жоғары). Бір жыл ішінде AMZN акциялары инвесторларға тек баға белгілеулерінің өсуі есебінен 87% әкелді.
Microsoft (MSFT)
Жалпы AI саласындағы жетекші екі компанияның бірі болып алға шықты. Бірақ қазіргі уақытта компанияның төртінші тоқсандағы нәтижелері нарықтардың көңілінен шығып тұрған жоқ. Дегенмен түсімнің 18%-ға өсімі айтарлықтай, әсіресе, Microsoft көлемін ескеретін болсақ. Компания жасанды интеллекті қолданумен бұлтқа негізделген AI қосымшаларында өте күшті және осыған дейін OpenAI-ге салған инвестициясының арқасында дами береді. Инвестициялық банктердің орташа мақсатты бағасы 470 доллар (шамамен 16% жоғары). Соңғы 12 айда компанияның акциялары 64 пайызға қымбаттады.
Alphabet Inc. (GOOGL)
Google-дің бас компаниясы ретінде Alphabet кең деректер инфрақұрылымы және машиналық оқыту мүмкіндіктері бар жасанды интеллект саласындағы басым күш болып отыр. Google компаниясының AI-ге негізделген өнімдері мен қызметтері табыстың өсуін жалғастыруда. Олардың көлемі мен үстемдігіне қарамастан, Alphabet-тің P/E қатынасы сектормен салыстырғанда салыстырмалы түрде қарапайым болып табылады. Бұл акцияның жоғары әлеуетін көрсетеді. Инвестициялық банктердің орташа мақсатты бағасы 165 доллар (шамамен 17% жоғары). GOOGL акциялары соңғы 12 айда 61%-ға өсті.
Taiwan Semiconductor Manufacturing (TSM)
Әлемдегі ең ірі жартылай өткізгіш өндіруші. Тайваньдық Semi компаниясы Nvidia және басқа жасанды интеллект чип өндірушілері үшін барлық озық AI жартылай өткізгіштерін шығарады. Жақында компания смартфондар мен электр көліктеріне сұраныстың аз болуына қарамастан, өнімділігі жоғары чиптерге сұраныс 2024 жылы кірістің 20%-ға өсуіне көмектесетінін айтты. Кәсіпорынның AI генерациясына сұраныс артып келеді және АҚШ-тың Қытайға технологияларды сатуға шектеулері жалпы сұранысқа аз ғана әсер етеді. Инвестициялық банктердің максималды мақсатты бағасы 160 доллар (шамамен 26% жоғары). Соңғы 12 айда TSM акциялары 34%-ға өсті.
Baidu (BIDU)
Қытайдағы жетекші іздеу провайдері. Компания жасанды интеллектіге белсенді түрде инвестиция салуды жалғастыруда. Бұл инвестициялар болашақта компания акцияларының бағасын нығайтуға негіз болмақ. Шын мәнінде, Baidu-ның AI-ға салған инвестициялары қазірдің өзінде жемісін бере бастады. Компания III тоқсанда жасанды интеллекттің арқасында күтпеген жерден күшті нәтижелерге қол жеткізді. Айналым мен пайда күткеннен асып түсті. Бір жыл ішінде BIDU акциялары 18,27%-ға құлдырады. Осы жылдың басындағы өсу трендіне (айына +5,5%) қайта оралды. Инвестициялық банктердің ағымдағы орташа мақсатты бағасы 162 доллар (шамамен 51% жоғары).
Жалпы жасанды интеллект өмірдің барлық дерлік саласына қосылып үлгерді. Соның ішінде — криптожобаларға. Fortune Business Insights есебіне көз салсақ, блокчейндегі бұл нарық 2027 жылға қарай $973,6 миллионға дейін өседі екен. Салыстыратын болсақ, 2020 жылы $220,5 миллион болған еді.