Америкалық Boeing әуе компаниясы тексерістен өте алмай қалды. Қаңтар айында АҚШ Азаматтық авиация басқармасы (Federal Aviation Administration, FAA) өндірістік тексеру жүргізген болатын. The New York Timesтың жазуынша, FAA Boeing 737 MAX-ты шығаруда және компанияның негізгі жеткізушілерінің біреуінен бірнеше мәселелерді анықтаған.
Толығырақ
Реттеуші қаңтар айының басында жолаушыларды тасымалдау кезінде есік қақпасы ұшып кеткен Alaska Airlines 737 MAX 9 ұшағына қатысты оқиғаны тергеу аясында Boeing компаниясының өндірістік процесінің әртүрлі аспектілеріне 89 тексеру жүргізді.
Boeing 89 тексерудің 33-нен өте алмады. Ал оның жеткізушісі – 737 MAX фюзеляжын шығаратын Spirit AeroSystems – 13 тексерудің жетеуінен өтпеді. Тексеру барысында Spirit қызметкерлері ұшақ есігінің тығыздығын тексеру үшін қонақ үй кілтінің картасын, ал есік тығыздағышын орнатқан кезде тұрмыстық сұйық сабынды қолданғаны анықталды.
Нарық реакциясы
Boeing акциялары жыл басынан бері 23,5% – ға төмендеді. Оның басты бәсекелесі Airbus осы кезеңде 11% – ға қымбаттады. Дүйсенбі күні Boeing бағалары 4,4% – ға төмендеді. Оған Нью-Йоркте АҚШ Әділет департаменті Alaska Airlines бортындағы оқиғаға қатысты қылмыстық тергеуді бастағаны туралы жаңалық себеп болған.
Сәтсіздік жолағы
Өткен аптада United Airlines әуе компаниясының 2 жыл бұрын шығарылған Boeing 777 ұшағы Сан-Францискодан ұшып бара жатып дөңгелегін жоғалтты. Ұшақтың дөңгелегі тұрақта тұрған көлікке құлады. Наурыз айының басында Boeing 737 ұшу кезінде қозғалтқышы жанып кетті. Ұшақ шұғыл түрде Хьюстонға қонуға мәжбүр болды.
Дүйсенбіде Чили LATAM Airlines әуе компаниясы рейсінің 10 жолаушысы мен үш экипаж мүшесі ауруханаға жеткізілді. Оған Boeing 787-9 Dreamliner Сиднейден Оклендке барар жолда турбуленттілікке тап болуы әсер еткен . Әуе компаниясы ұшу кезінде «қатты қозғалыс тудырған техникалық ақаулық» туралы мәлімдеді.
Reuters сауалнамасына қатысқан сарапшылар Boeing зауытына жүргізілетін қосымша тексерулер авиакомпанияның және көптеген жеткізушілердің негізгі табыс көзі болып отырған 737 Max 8 лайнер өндірісін баяулатады деп қорқады.
FAA Boeing-ке өндіріс сапасы жақсарғанға дейін 737 MAX желісінің лайнерлерін шығаруды арттыруға тыйым салды. Ақпан айының соңында басқарма Boeing-ке сапаны бақылау мәселелерін шешу жоспарын дайындауға 90 күн берді.
Reuters желтоқсанда Boeing 737 өндіріс кестесі бойынша ақпанда өндірісті 42 ұшаққа арттыруға тиіс болғанын жазды. Ал тамызда 47,2 , сосын 2025 жылдың ақпанында 52,5 және 2025 жылдың қазанында 57,7 ұшаққа ұлғайтуды көздеген. Boeing өндірісінің қарқыны осы кестеден артта қалуы мүмкін, деп атап өтті ақпарат агенттігі.
Өткен жылдың төртінші тоқсанында Boeing таза шығынды бір акцияға шаққанда 30 млн долларға немесе 0,04 долларға дейін қысқартты.
