![](https://kz.kursiv.media/wp-content/uploads/2022/01/old-image-85215.jpg)
Қырғызстан мен Қазақстан Қырғыз Республикасында сертификатталған өнімдердің айналымына шектеулер енгізбеу туралы келісімге келді. Бұл туралы көрші елдің Экономика және сауда министрлігі хабарлады.
«Қазақстанның Сауда және интеграция министрлігінің Техникалық реттеу және метрология комитеті мен Қырғызстанның Экономика және сауда министрлігі арасында өнімнің сәйкестігін бағалау саласындағы талаптар мен бақылауды күшейту бойынша алдағы бірлескен шаралар туралы кеңес өтті», – деп хабарлады Қырғызстан тарапы.
Тараптар «сұр сертификаттарды» бермеуге бағытталған шараларды бірлесіп жүзеге асыруға келісті.
«Тараптар Қазақстан мен Қырғызстанның сәйкестікті растау жөніндегі органдары берген біркелкі сәйкестікті растау құжаттарымен қоса өнім айналымына шектеулер мен тыйымдар енгізбестен қабылданған шаралар кешенін жүзеге асыруға келісті», – деп хабарлады министрлік.
Бұған дейін Қазақстанда тиісті құжат жария талқыға шығарылған еді
Еске сала кетсек, Қазақстан 2024 жылдың 1 шілдесінен бастап Қырғызстанда сертификатталған өнімдерге тыйым салынуы мүмкін, деп хабарлаған. Тиісті құжат Ашық НҚА порталында жария талқыға шығарылды.
Бұл өзгеріс Еуразиялық экономикалық одақ шеңберінде техникалық реттеу туралы хаттаманың 9-тармағына сәйкес қарастырылды. Құжат бойынша Одаққа мүше мемлекет қауіпті өнімнің айналымға шығарылуын болдырмау жөніндегі шұғыл шаралар қабылдай алады.
«Шарттың 29-бабының 1-тармағында, егер мұндай шектеулер адамның өмірі мен денсаулығын, қоршаған ортаны қорғау үшін қажет болған жағдайда, мүше мемлекеттер тауарлармен өзара саудада шектеулерді (мұндай шаралар негізсіз кемсіту құралы немесе сауданы жасырын шектеу құралы болып табылмайтын жағдайда) қолдануға құқылы екендігі де тікелей белгіленген», – деп жазылған құжатта.
Осылайша, Қазақстан ЕАЭО техникалық регламенттерінде белгіленген сәйкестікті бағалау рәсімдерінен өтпеген өнімдерден қорғауға бағытталған шаралар қабылдауды шешкен.
Регламентті бұзу – ЕАЭО туралы шартты бұзу болып есептеледі
«Қазіргі уақытта ЕАЭО – ға мүше мемлекеттердің бірінің сәйкестікті растау жөніндегі органдары рәсімдерді бұзушылықтармен сәйкестікті бағалау туралы құжаттарды және сынақтар жүргізбей рәсімдеуде», – деп жазылған құжатта.
Атап айтқанда, ЕАЭО KG **тіркеу нөмірлері бар құжаттарды рәсімдеу жағдайы тіркелген. Сәйкестікті бағалау рәсімдерін бұзу – техникалық регламенттерді бұзу. Тиісінше ЕАЭО туралы шартты бұзу болып есептеледі.