Orbis Manufacturing Алматыдағы жаңа автозауытта қытай көліктерін шығару үшін 72 млрд теңге инвестициялайды
Orbis Manufacturing компаниясы Yibin Kaiyi Automobile Co.Ltd автомобиль концернімен меморандумға қол қойды. Құжат Orbis Manufacturing компаниясының Қазақстанда KAIYI брендінің автомобильдерін шығару құқығын растайды. Бұл туралы компанияның баспасөз қызметі хабарлады.
Меморандум бойынша, қытайлық өндіруші Orbis Manufacturing компаниясына толық цикл технологиясы бойынша KAIYI автомобильдерін өндіру үшін толық қолдау көрсететіні бекітілген.
«ҚР мен ҚХР арасындағы сауда-экономикалық әріптестік дамып жатыр. Біздің мақсатымыз – қазақстандық тұтынушыларға ең заманауи талаптарға сай және қала көтеретін бағамен жаңа өнім ұсыну. Біз Қытайдың жетекші брендтерінің жоғары технологиялық автомобильдерін өндіруді ұйымдастыруға шамамен 72 млрд теңге инвестициялаймыз. Біздің жобамыз Қазақстан мен ҚХР арасындағы сауда-экономикалық байланыстарды нығайтуға және қазақстандық тауарлардың экспорттық жылжуына және сауданың дамуына ықпал ететініне сенімдіміз», – деді Orbis Kazakhstan президенті Сухраб Махмудов.
2024 жылдың екінші тоқсанында Orbis Kazakhstan Orbis Manufacturing көлік құралдарын өндіру бойынша толық циклді автомобиль зауытын салуға кіріседі. Қазіргі уақытта жобалау-сметалық құжаттамасының жұмыс аяқталды. Зауыт кешені ҚХР автомобиль индустриясы көшбасшыларының стандарттары бойынша және Қытайдың автоөнеркәсіптің жетекші кәсіпорындарының озық технологияларын пайдалана отырып, Алматының индустриялық аймағында салынады.
Кәсіпорын ең заманауи технологиялық жабдықтармен жабдықталады. Зауыт кешенінің өндірістік қуаты – жылына 80 мың автомобиль. Зауыт кешенінің жұмысының бірінші кезеңінде 1500 жоғары білікті және жоғары ақы төленетін жұмыс орны құрылатыны атап өтілді.
Orbis Manufacturing – Фаррух пен Сухраб Махмудовтардың Orbis Kazakhstan еншілес кәсіпорны. 2023 жылғы мамырда Orbis Kazakhstan компаниясы Exeed International компаниясымен Қазақстанда (сонымен қатар Алматыда) автомобильдер мен осы марканы құрастыру туралы келісімге қол қойды.
Қазақстанда сатылған ең танымал он брендтің жетеуі Қытайда шығарылған
2023 жылдың қорытындысы бойынша Қазақстанда сатылған он ең танымал брендтің жетеуі Қытайда шығарылған. Өткен жылы қытайлық автобрендтер қазақстандық нарықтағы үлесін екі есе арттырды. Бір жылда 40 мыңнан астам көлік сатқан (жалпы ресми сатылым 200 мың, бұл отандық авторетейл тарихындағы ең үздік көрсеткіш). Қазақстанда ең көп сатылатын қытайлық автобрендтер – Chery, Haval және Jac.
Мамыр айында Қазақстанда Kaiyi көлігінің сатылымы ресми түрде басталады. Бұл Қазақстан нарығындағы 15-ші қытайлық автобренд. Қазақстан нарығындағы орын үшін Аспан асты елінің авоөндірушілері арасында іштей тайталас бастала ма? Әлде оларға шетелдік бәсекелестерге төтеп беру керек бола ма? «Курсив» осы жайды сарапшылардан сұрап көрді.
Көптеген қытайлық брендтің ресми дистрибьюторлары Қазақстандағы басты бәсекелесі кім екенін айтудан бас тартты. Тек Қазақстандағы Omoda брендінің өкілдері ғана ойларымен бөлісе алды. Бұл бренд жергілікті нарықта өздеріне корей мен жапондық автоөндірушілер бәсеке туғызатынын айтты.
«Сапасы мен жабдықталу жағынан алып қарайтын болсақ, Қытай автоөнеркәсібі көпке танымал корей, жапон брендтерінен кем түспейді. Бірақ бағасы жағынан тұтынушыға тиімді ұсыныс жасай алады», – деді Omoda және Jaecoo ресми дистрибьюторы саналатын Aster компаниясының өкілдері. Бұл екеуі де Chery Automobile концернінің құрамына кіреді.
Автокөлік нарығын бақылау және талдау агенттігі (АНБТА) директоры Артур Мискарян:
«Барлық қытайлық брендтер жиынтығы нарықтың шамамен 20%-ын алады. Бірақ Chevrolet немесе Hyundai барлық қытайлық брендтің сатқанынан асып түсті. Сондықтан әзірге қытайлық брендтердің өзара бәсекелесуі, оның үстіне бір концернге кіретін суббрендтердің бәсекелесуі жайлы айту мүмкін емес. Ең әуелі жалпы қытайлық брендтердің нарықта орнығуы, жайғасу мен алдағы стратегиясы жайында сөз болып отыр», – дейді.
Қазірдің өзінде Қазақстанда қытайлық Jetour және Jac жасалды. Jac 2015 жылдан бері Қазақстанда жасалуда. 2025 жылы Astana Motors қытайлық Chery, Haval, Changan көліктерін шығара бастайды.
