Қасым-Жомарт Тоқаев Батыс Қазақстан облысына жұмыс сапары кезінде Ішкі істер органдары, Төтенше жағдайлар департаменті, Ұлттық ұлан қызметкерлерінен құралған құтқарушылар тобымен және су тасқынына қарсы шараларға белсенді қатысып жатқан еріктілермен жүздесті.
Кездесу барысында Президент табиғи апатпен күреске атсалысқан барлық азаматқа ризашылығын білдіріп, олар бүкіл еліміз үшін өте маңызды, игі іс атқарып жүргенін атап өтті.
– Көп ұзамай бұл жұмыстар да аяқталады. Қиындықты қалай да еңсереміз. Осында еңбек етіп жүрген құтқарушылар, полицейлер, еріктілер лайықты деңгейде марапатталады. Бұл міндетті түрде менің бақылауымда болады, – деді Қасым-Жомарт Тоқаев.
Қазақстанда көктемгі су тасқынымен күрес шараларына ведомстволар мен құрылымдар жұмылған. Қызыл су жолдарды бұзып, елдімекендерге жайылуда. Президент БҚО-да өткен жедел штаб отырысында сала мамандары тапшылығы күрмеулі мәселе екенін атап өтті.
Соған байланысты жедел түрде гидротехник, ирригатор, су саласы мамандарын дайындауды тапсырды. Алдағы уақытта су тасқынының алдын алу шараларын жүйелеу қарастырылмақ.
