Израиль мен Иран арасындағы қақтығыстың өршуі мұнай нарығын құбылтты
4 сәуір Brent маркалы мұнай бағасы қымбаттауын жалғастырып, барреліне 91,1 долларды (+2,0%) құрады. Бұл туралы Қазақстан қаржыгерлер қауымдастығының талдауында жазылған.
Екі фактордың ықпалы
«Бағаның өсуіне ықпал еткен негізгі фактор – Дамаскідегі Иран консулдығына жасалған әуе шабуылынан кейін, Израиль мен Иран арасындағы қақтығыстың өршу қаупі. Бұған қоса, АҚШ-та шикізатқа сұраныстың артуы байқалады. Елдегі бензин қоры өткен аптада 4,26 миллион баррельге азайды», – деп есептейді сарапшылар.
Bloomberg ақпаратына сүйенсек, Brent маркалы «мұнай «қара алтын» бағасы 91 долларға дейін қымбаттаған, бұл қазан айынан бергі ең жоғары көрсеткіш. Ал West Texas Intermediate маркалы мұнай бағасы шамамен 87 долларға жеткен.
Былтырғы көрсеткіштерге де Таяу Шығыстағы жағдай әсер еткен
2023 жылы шикі мұнай бағасы Таяу Шығыс пен Украинадағы геосаяси шиеленістер, сондай-ақ ОПЕК+ тасымалдауларының шектеулері әсерінен 18% өсті.
«Израиль мен ХАМАС арасындағы қақтығыстан кейін Хуситтердің Қызыл теңіздегі кемелерге шабуыл жасауы тасымалдау шығындарының өсуіне алып келген», – деп жазды басылым.
2 сәуірде Лондонның ICE Futures биржасында Brent мұнайының маусым айындағы фьючерстерінің құны барреліне 88,87 долларды құраған. Бұл алдыңғы сауданың жабылуындағы көрсеткіштен 1,45 доллар (1,66%) жоғары.
Нью-Йорк тауар биржасында (NYMEX) электронды саудада мамыр айындағы WTI мұнай фьючерстерінің бағасы 1,52 долларға (1,82%) өсті. Осылайша барреліне 85,23 долларды құрады. Бұл көрсеткіштер өткен жылдың қазан айында қазіргі деңгейден жоғары болған.
Еске сала кетсек, Украина Ресей мұнай өндіру зауыттарына шабуыл жасады.
Кейін Ресейде бензин бағасы едәуір көтерілді.
DW ақпаратына сүйенсек, Санкт-Петербург халықаралық тауар-шикізат биржасындағы АИ-95 бензинінің бағасы алты ай ішінде ең жоғары деңгейге жеткен.
Goldman Sachs компаниясы Brent бағасы барреліне 70-90 доллар шамасында қалыптасады деп болжам жасаған.
Сауд Арабиясы Азия елдеріне жеткізілетін мұнай бағасын көтерді. Алайда басқа аймақтар үшін «қара алтын» бағасын арзандады. Бұл шешім осы айда күшіне енді.
Азия елдеріне жеткізілетін Arab Extra Light және Arab Light маркалы шикізат барреліне 0,2 долларға қымбаттайды. Нәтижесінде Оман/Дубай «қара алтыны» бағасынан асып түсті. Яғни барреліне 1,7 долларға жоғары болады. Осылайша аталған маркалардың құны барреліне 0,3 долларға өседі.
