Биыл Орталық Азия елдерінде ЖІӨ өсу қарқыны 4,1%-ға дейін төмендейді – Дүниежүзілік банк
Биыл Еуропа мен Орталық Азия аймағындағы экономикалық белсенділік баяулауы мүмкін. Бұған себеп – қатаң ақша-несие саясаты, Қытай экономикасының баяулауы және шикізат бағасының төмендеуі. Бұл туралы Дүниежүзілік банктің аймақ экономикасы туралы жарияланған баяндамасында жазылған.
2024 жылы аймақтың экономикалық өсу қарқыны 2,8% -ға дейін баяулауы мүмкін. Осыған дейін көрсеткіш 3,3%-ға дейін айтарлықтай өскен.
2023 жылы Орталық Азия экономикасына Ресей мен Украина арасындағы қақтығыс ықпал етті. 2025 жылы өңірде өндіріс қарқыны артуы мүмкін. Жалпы болжамның орындалуына көптеген фактор әсер етеді. Егер аймақтағы экономикалық даму баяуласа, экономика одан әрі әлсірейді.
«Еуропа мен Орталық Азия елдері көптеген жаһандық дағдарыстарға қарсы тұруды жалғастыруда. Оған әлемдік экономикадағы жағдайлар ықпал етуде. Бизнестің ілгері жылжуы мен тәуекелге төзімділікті арттыруы экономикалық дамуды жеделдетті», – деді Дүниежүзілік банктің вице-президенті Антонелла Бассани.
Экономикалық өсімді қалпына келтіруге Ресейдің Украинаға басып кіруі, пандемия және 2022 жылғы инфляция кедергі келтірді.
«Еуропа мен Орталық Азиядағы дамушы нарықтардағы және дамушы экономикалардағы (EMEDs) инфляция негізінен азық-түлік пен энергияға жаһандық бағалардың күрт төмендеуінің арқасында құлдырады. Тұтыну бағасының орташа жылдық өсімі 2023 жылдың басындағы 15%-дан 2024 жылдың ақпанында 4,2%-ға төмендеді. Дегенмен, 2022 жылы өткен жылы нақты кірістердің өсуіне қарамастан инфляция үй шаруашылықтарына әсер етуде», – деп жазылған баяндамада.
Дүниежүзілік банк болжамына сүйенсек, Түркияда биылғы жылы экономикалық өсім 3%-ға дейін баяулауы мүмкін. Бұл – 2009 жылдан бергі ең төменгі көрсеткіш.
«Әлемдік мұнай бағасының төмен деңгейі Орталық Азияның барлық елдеріндегі экономикалық жағдайға әсер етеді: 2024 жылы өсу қарқыны 4,1%-ға дейін төмендейді деп күтілуде, ал 2023 жылы 5,5%-ға бағаланған», – деп жазылған болжамда.
Бұған дейін Дүниежүзілік банк (ДБ) Қазақстанның жалпы ішкі өнімі 2024 жылы 4,3% деңгейінде өседі деп болжады. Бұл туралы халықаралық ұйымның Global Economic Prospects баяндамасында жазылған.
Жаһандық банк 2023 жылдың маусымында елдің экономикалық өсуін 2024 жылы 4% және 2025 жылы 3,6% деңгейінде қалыптасады деп болжаған еді.
Қаржы ұйымының бағалауы бойынша, өткен 2023 жылы Қазақстанның ЖІӨ өсімі 4,5%-ды құрады.
