«Мән-жайды анықтаймын»: Балаева Бишімбаев сотына Ксения Собчактың келуіне қатысты пікір білдірді
Мәдениет және ақпарат министрі Аида Балаева бұрынғы ұлттық экономика министрі Қуандық Бишімбаевтың сотына ресейлік журналист Ксения Собчактың келуіне қатысты пікір білдірді.
Мәжіліс кулуарында БАҚ өкілі министрге: «Бүгін экс-министр Қуандық Бишімбаевтың сотына ресейлік тележүргізуші Ксения Собчак келді. Бұл Мәдениет жән ақпарат министрлігімен келісілді ме? Шетелдік журналист ретінде оған басымдық берілді ме?», – деген сауал жолданды.
Ведомство басшысы Аида Балаева мұны БАҚ-та ақпарат тарағаннан кейін білгенін айтты.
«Мұны қараймыз. Өзім де журналистің келгені туралы ақпаратты БАҚ-тан көрдім. Оқиғаның мән-жайын анықтаймын. Айтпақшы, мен сот процесін бақылап жүрген жоқпын және оны сіздердің материалдарыңыздан білемін», – деді Балаева.
Айта кетейік, ресейлік журналист Ксения Собчактың Қуандық Бишімбаевқа қатысты сот отырысына келгенін хабарлаған едік. Собчак қайтыс болған Салтанат Нүкенованың туыстарының қорғаушылары маңына отырған. Бұрын ол жерде Нүкенованың ата-анасы отыратын. Бұл жолғы отырысқа олар келмеген.
10 сәуір күні судья Айжан Құлбаева «алқабилердің жүзін көрсетті» деген себеппен сот залынан журналистерді шығарып жіберген. 22 сәуір таңертең сот отырысы басталғанда Құлбаева алқа билер бейнесін КТК арнасы таратқанын, оларға ескерту жарияланғанын айтып, сот залына журналистерді кіргізуге қайта рұқсат берген. 22 сәуір түсте сот отырысының екінші кезеңі басталғанда, отырысқа ресейлік журналист Ксения Собчак келді.
18 сәуірдегі сот отырысында екінші күдікті Бақытжан Байжанов сотқа Нүкенова қайтыс болған күні Ресей президенті Владимир Путиннің делегациясы қылмыс Bau мейрамханасына келуі керек болғанын айтты. Нүкенова туыстарының адвокаты Жанна Оразбахованың сауалына жауап беру кезінде Байжанов ресейлік делегация 2023 жылдың 9 қарашасында аталған мейрамхананың VIP-кабинасын брондағанын атап өтті.
