«Алтыналмастың» еншілес компаниясы өңделетін кен көлемін жылына 3 млн тоннаға жеткізбек
«Алтыналмас» АҚ тобына кіретін «Алтыналмас Technology» алтын өндіруші компаниясы бір жылда өңделетін кен көлемін 2,5 млн тоннадан 3 млн тоннаға дейін жеткізуге ниетті. Бұл туралы компанияның Бірыңғай экологиялық порталға жүктеген құжаттарында жазылған.
«Алтыналмас Technology» ЖШС-не қарасты фабрика «Долинное» кен орнындағы алтын кенін өңдеумен айналысады. Бұл кеннен Дөре құйма алтыны алынады. Қазіргі кезде фабрика жылына 2,5 млн тонна алтын кенін өңдейді. Енді зауыттың өндірістік қуаты жылына 3 млн тоннаға дейін артпақ.
«Долинное» алтын өңдеу зауыты «Пустынное» кен орны аумағында, «Алтыналмас» АҚ алтын өндіру зауытының жанында орналасқан. Әкімшілік аймағы Қарағанды облысының Ақтоғай ауданына қарайды. Зауыттан шығысқа қарай 85 шақырым жерде Балқаш қаласы жатса, Балқаш-Ақтоғай желісінің Ақжайдақ темір жол станциясы солтүстік-шығысқа қарай 17,7 шақырым жерде орналасқан.
Өңделетін кен құрамындағы алтын үлесі тоннасына 1,15 граммды құрайды. Алтын өндіру зауыты 12 сағаттық екі ауысымда вахталық әдіспен жылына 365 күн жұмыс істейтін болады. Зауыт жұмысына қажет технологиялық су Балқаш көлінен алынады.
Бұл ретте пайдаланылатын табиғи ресурс түрі өзгермейді. Кәсіпорынның кен өндіретін жер телімінің аумағы да сол күйі қалады. «Долинное» алтын өңдеу зауыты «Алтыналмастың» жұмыс істеп тұрған алтын өндіру зауытының аумағында орналасқанын, ол үшін 3000 м көлемінде санитарлық-қорғау аймағы белгіленгенін ескере отырып, бүкіл кәсіпорынға 3000 м жалпы санитарлық қорғау аймағын құру туралы шешім қабылданған.
«Алтыналмас» холдингі қазақстандық алтын өндірушілердің үштігіне кіреді. 2023 жылдың 30 қыркүйегіндегі жағдай бойынша оның 13 еншілес компаниясы бар. Компания акционерлері: GOUDEN RESERVES B.V. (60% жай акциялар), Владимир Жұманбаев (20%), Дияр Қанашев (10,5%) және Игорь Ветиул (6,5%).
Топ активтері Жамбыл, Қарағанды, Абай және Ақмола облыстарында орналасқан. Өндірілген кен «Ақбақай», «Долинное», «Ақсу» алтын өндіру зауыттарында, «Пустынное» кен байыту фабрикасында және «Алтыналмас Technology» бағалы метал өңдеу зауытында қайта өңделеді.
