Билығы жылдың сәуірінде Орал қаласы сотының шешімімен Батыс Қазақстан облысының екі тұрғыны Қылмыстық кодекстің 206, 250 және 198-баптарында көзделген қылмыстарды жасағаны үшін әрқайсысы 2 жыл 6 айға бас бостандығыннан айырылды. Бұл туралы Ұлттық қауіпсіздік комитеті хабарлады.
Олар Ұлттық тестілеу орталығынан ақпараттарды заңсыз көшіріп алған.
Сондай-ақ қос азамат коммерциялық ұйымдарда 5 жыл мерзімге басшылық лауазымдарды атқару құқығынан айрылды.
«Үкім шығаруға ҰҚК-нің іс жүргізу материалдары негіз болды, оған сәйкес сотталғандар 2021-2022 жылдары Қазақстанның ғылым және жоғары білім министрлігі Ұлттық тестілеу орталығының заңмен қорғалатын ақпаратына заңсыз қол жеткізіп, көшіріп алған», – деп хабарлады ҰҚК.
Үкім заңды күшіне енді.
Еске сала кетсек, Ғылым және жоғары білім министрлігі ҰБТ-ға тіркеу мерзімін бір күнге ұзартты.
Негізгі ҰБТ-2024-ке 6 мамырдан 14 мамырға дейін өтініш қабылданған болатын. Биыл Ғылым және жоғары білім министрлігінің шешімімен барлық талапкерге негізгі ҰБТ-ны екі рет тапсыруға мүмкіндік берілді. Тестілеудің өзі 16 мамырда басталған, 5 шілдеге дейін жалғасады.
Бұған дейін Ғылым және жоғары білім министрлігі жоғары оқу орындарына түсуге арналған гранттар тізімін жариялаған болатын. Тізімді мына жерден көруге болады.
