Сатып алушылар көктем жаңбырлы болса да, Inditex-тің жазғы топтамасын сатып алды / Фото: Reuters / Vincent West
Zara және Massimo Dutti брендтерінің иесі әлемдегі ең ірі Inditex сән саудагерінің акциясы 5% – дан аса қымбаттады. Компанияның тоқсандық кірісі мен пайдасы туралы есебі сарапшылардың топшылауына сәйкес келді. Бірақ екінші тоқсанның бірінші айында жазғы топтамасының көп сатылуына байланысты ол инвесторларды таң қалдырды.
Толығырақ
Inditex акциялары сәрсенбіде Мадридтегі саудада өсу үстінде. Қағаздардың құны мезетінде 46,3 еуроға дейін – алдыңғы сауданың жабылу бағасынан 5,3%-ға жоғары көтерілді. Бұл наурыз айынан бері компанияның акция бағасының ең күрт өсуі деді Bloomberg.
Соңғы рет осы деңгейге дейін компанияның баға көрсеткіші сәуір айының басында көтеріліп, олардың сауда тарихындағы рекорды жаңарған болатын.
Акция бағасы неге өсіп келеді?
Inditex сәрсенбіде 30 сәуірде аяқталған тоқсандық қаржы нәтижесі туралы есеп берді. Компанияның таза кірісі 1,29 млрд еуроға жетті ( 1,4 млрд доллар) — бұл өткен жылдың сәйкес кезеңімен салыстырғанда 11%-ға көп. Сонымен қатар, бұл компания үшін рекордтық көрсеткіш: әдетте бірінші тоқсанның кірісі төмен болатын дейді Barron’s.
Сатылым жыл сайын 7%-ға – 8,15 млрд еуроға (8,87 миллиард долларға) дейін артып отыр.
Reuters сілтеме жасаған LSEG мәліметтері бойынша, компанияның нәтижелері сарапшылардың болжамына сай келді. Сонымен қатар, Inditex өткен жылдың сәйкес кезеңімен салыстырғанда бір ай ішінде — 1 мамырдан 3 маусым аралығында сатылымның 12%-ға артқанын хабарлап, нарықты таң қалдырды. Бұл екінші тоқсанның «керемет бастамасы», – деді Jefferies сарапшысы Джеймс Гржинич. Ол қазір компания жөнінде «консенсустық болжамның қалыпты өсуін» күтетінін жеткізді.
Бұл нені білдіреді?
Inditex сән трендтеріне жылдам ілесу арқылы, нарықтағы H&M сияқты басқа ойыншыларға мықты бәсекелес болуға ұмтылады дейді Reuters. Сонымен қатар, басқа сатушылар сияқты бұл компания да тез өсіп келе жатқан қытайлық SheIn және Temu интернет-дүкендерімен жарысуға мәжбүр. Сөйте тұра, соңғы тоқсандарда Inditex бәсекелестерінен озып кетті және дүкендері мен онлайн сатылымдарын жаңартудың арқасында пайдаға кенелді деп жазады Reuters.
Атап айтқанда, Zara бренді өткен қарашадан бастап TikTok-тың Қытайға арналған Douyin нұсқасында апта сайын бес сағаттық шопинг-шоу жүргізе бастады. Қытайлық сатып алушыларға арналған хабарлар Zara-ға осы жылдың бірінші тоқсанында өткен жылдың сәйкес кезеңімен салыстырғанда сол елдегі сатылымды 50%-ға арттыруға көмектесті дейді Reuters. Еуропа мен АҚШ-қа да осындай трансляциялар жасауды Zara күзге жоспарлап отыр.
Әрі қарай не болады?
Inditex өз дүкендері мен жеткізу жүйесіне инвестиция салуды жалғастыра бермек және биыл дүкендер мен технологияларды жақсартуға, логистиканы кеңейтуге 2,7 млрд еуро жұмсауды жоспарлап отыр деп жазады Bloomberg. 2025 жылдың екінші жартысында Inditex Zara және Bershka дүкендерін қоса алғанда, жалпы аумағы 7,2 млн шаршы фут (0,7 млн шаршы метр) қосымша сауда алаңын іске қосуға ниетті.
Акцияның жайы
FactSet сауалнамасына қатысқан 22 сарапшының он үші Inditex акцияларын сатып алуды ұсынады. Ал сегіз сарапшы инвесторларға акцияларын портфельде ұстай тұруға, екеуі сатуға кеңес береді.
